No.2380/2021-2022

Aizawl the 29th September, 2021: Nimin ni 28.9.2021 (Thawhlehni zan) khan Human Resources Development Board bultumin, School Education Department hnuaia directorate – School Education & SCERT, MBSE leh Mizoram IT Society te tangkawp chuan School head leh Education hnuaia administrator-ho te tan 'Webinar on ICT enabled school management for educational administrators and head of institution' buatsaih ni a. School Education Pu Lalchhandama Ralte chuan khuallian niin he Webinar hi a hmanpui. Covid-19 avanga sikulin harsatna an hmachhawnte sut kian nan ICT hman tangkai lehzual dante, sum leh pai sengso si lova kawng inkawhhmuh leh sikul enkawl dan te he webinar-ah hian in kawhhmuh a ni.

Khuallian Pu Lalchhandama Ralte, Hon’ble Minister, School Education chuan thusawiin, Education department chu Covid-19 hripui leng avanga lockdown tuar ber an ni tih sawiin, zirna in hawn theih a ni lova, thawktuten chawl mai lova Information Communication Technology hmang tangkaia zirtirna an kalpui thei chu a lawmawm takzet a ni a ti. Khawvel hmasawnna ruala ke pen theihna turin kum 1984-ah Educational Technology Cell Mizoramah din a lo ni tawh a ti a, sikulte hman tangkai turin computer thahnem tak sikul 288 hnenah pek a lo nih tawh tih a sawi bawk.
Minister chuan Lockdown avanga zirna pangngai kalpui theih a nih loh avangin sawrkarin ruahmanna chi hrang hrang kalpuiin, alternative calendar-te, bridge course-te, video clip te siamin tutorial class te pawh a siam a ni a ti a. Rualkhai zawka Online zirtirna kalpui a nih theihna turin Human Resources Development Board, Govt. of Mizoram chuan 21st May, 2021 khan Online Education Committee a din a, anni hmalakna hian zirna ina ICT tihhmasawn nan ruahmanna cheng Vaibelchhe 152 hmachhawp kalpui mek a ni tih khuallian hian a sawi bawk.

Pu L. Thangmawia, MLA, Vice Chairman, HRD board chuan key note address sawiin Covid hripui avanga hasatna hi IT lama hmelthar hmuh nan hmang thei ila, school head leh administrator-ten ICT hmasawna kan umphak a, a pawimawhna leh tangkaina kan zir chhuah a duh thu a sawi bawk.

Webinar-ah hian Overview of National Policy on Education (NEP 2020) tih thupui hmangin Pi Lallianzuali Bawitlung, Deputy Director (P), Directorate of School Education in Head of Institution te tana hriattur pawimawh zual leh thil thar awmte sawiin hun a hmang a, a hnen atang hian NEP 2020 a thil pawimawh hriat awm tak takte ngaih thlak a ni.

Technical Session 1-ah ‘ICT Enabled School Management’ tih thupui hmangin Dr. C. Lalnuntluanga, System Administrator, MZU & President Mizoram IT Society chuan hun a hmang a. School enkawl nana Information Communication Technology (ICT) tangkai zawk a hman dan chungchang a sawi a, man chawi ngai lova school ten software leh google hman dan kawng in kawhhmuh a ni. Technical Session 2-ah ‘Service available for School under initiatives of ICT Department, Govt. of Mizoram’ tih thupui hmangin Pu C. Lalrinfela, System Analyst, Dept. of ICT in hun a hmang a. A hnen atang hian Mizoram ICT Dept. hmalakna leh school tana an tih sak theih chi hrang hrang ngaih thlak a ni a, ICT chungchanga school mamawh leh tih sak theih an neih te hi a thlawn tihsak an inhuam thu te a sawi.

Webinar on ICT enabled school management for educational administrators and head of institution Nizana neih hi Pu James Lalrinchhana School Education Director-in a kaihruai a, School Education, SCERT, MBSE officer pawimawh tak tak te leh Primary atanga Higher Secondary School Principal leh Headmaster te an tel a. Webinar hi HRD Board hnuaia Online Training vawi 4-na a ni a, Training buatsaih tawha participants tam ber tum a ni a, participant 3540 an awm a ni. Science leh Mathematics teacher-te tan hlawhtling takin buatsaih a lo ni tawh bawk a, zanin hian Science leh Mathematics teacher ni lo zirtirtu dang zawng tan buatsaih a ni leh dawn a ni.

Attachment

  • Loading attachment...