4044/2022-2023

Aizawl the 30th March 2023 : Vawiin khan Hnahthialah District Fisheries Development Officer (DFDO) Office thar chu Health and Family Welfare Minister, bialtu MLA ni bawk, Dr. R. Lalthangliana chuan khuallian niin a hawng. DFDO office hawn lawmna inkhawm hi Zofa Run, Lunglengah neih niin Pu K. Lalrinliana Fisheries Minister chu khualzahawm a ni.

Khuallian Dr. R. Lalthangliana chuan District thar tihpuitlin nan DFDO office hawn a ni ta chu lawmawm a tih thu a sawi a. Fisheries Department changtu Minister Pu K. Lalrinliana ho ngei a hawn a ni thei chu lawmawm ti hle. Mizorama lui te chu humhalh that a nih chuan lui lam sa ah intodelhna tham a awm thu sawiin, Sangha leh lui lam sa te chu uluk taka enkawl chuan thangduh hle in, intodelhna tham leh dinchhuahna tham a nih thu a sawi.

Khualzahawm Pu K. Lalrinliana Fisheries Minister pawhin thu sawiin; Sangha leh lui lam sa te chu chaw tha leh hrisel a ni tiin intodelh loh avangin state dang atangin sa chi hrang hrang lakluh a ngai thin chu pawi a ti hle a; humhalhna kawngah mipui leh Sawrkar tan ho a pawimawh thu a sawi a ni.

He hun hi Fisheries Department Secretary, Pu Laldawngliana’n a kaihruai a. Pu F.Vanlallawma, Director, Fisheries Department in report a pe bawk. Pu R. Lalremsanga DC Hnahthial pawhin thusawi tawi neiin Pi Christina Lalramchhani, DFDO Lunglei in lawmthu sawiin hun a khar a ni.