1869/2025-2026

Siaha, 11th October, 2025 : Vawiin chawhnu dár 1:15 khan Health and Hope Society (HHS) & Study Centre chu HC. Rotha Building, Siaha Bazar-ah hawn a ni. He hunah hian HHS Ambulance Service hlanna hun hman nghal a ni.

Vawiin programme hi Pu Vabeilaikhai, HHS Executive Member-in a kaihruai a, Rev. Dr. Setha Solo, Principal, Maraland Theological College, Siaha-in Hunserh hmangin office leh Ambulance Pathian hnena hlanna a nei nghal a ni. Health and Hope Society kalpuitute zinga mi Pi C. Rachael (Subject Matter Specialist, KVK) in HHS chungchang sawizauna hun a nei a, kum 2019 ah Siaha District ah HHS hi din niin, HHS thiltum chu beiseina thar pêk a, khawtlang harsatna sutkian leh mi harsate chhawmdawl hi a ni, a ti a. Eizawnna kawnga mipui an lo in tunnun nana puih chhunzawm zel hi kan tum a ni, a ti bawk. HHS study centre hi Siahaah pahnih hawn a ni tawh a, school hrang hranga zirlai te'n ṭangkai takin an hmang mêk a ni.

Pi C. Rachael chuan ambulance hi nu raipuar leh naupangte tan Siaha khawpui chhungah a thlawna hman theih a ni a, puitling tán vawikhat hmanah Siaha khawchhung bikah ₹200 a nih tur thu a sawi. Ambulance hmang duh tán Pu HC Samuel - 9378176076, 7630995871, Pi C. Rachael - 6033023828/8415033617 biak theih an ni.

Health and Hope Society thupui kalpui chu 'Empowering lives through education' tih niin, hriselnaah te, zirnaah te leh chhawmdawl ngai chhawmdawl chungchangah hmalakna an nei ṭhin a ni.

Pi Pi Chaki, President, MCHP General Headquarters, Dr. Chieky Azyu, District Hospital Siahaa Medical Officer leh Pu Heibikliana Thangtu (Executive member, HHS) in thu tawi sawiin Pi Florence T. Azyu (Asst. Secretary, HSS) in lawmthu sawina neiin vawiin hman hun tihtawp a ni.

Health and Hope hi ram pathum India, Myanmar leh United kingdom-ah te awmin www.healthandhope.org ah kimchang zawkin a en theih a, healthandhopesociety@gmail.com ah biakpawh theih an ni.