Law Commission Chairman, Aizawl East I bialtu MLA Pu R Lalrinawma chuan vawiin khan Falkland vengah Health Clinic a hawng.

Health Clinic hawnna inkhawmah Pu R Lalrinawma chuan hriselna pawimawhzia sawiin hmasawnna tluantling nei tur chuan hrisel hmasak a tul a, intodelh tur pawhin mipuite kan hrisel hmasak a pawimawh a ni, a ti. Mipuite an lo hrisel theih nan sorkar chuan kawng hrang hrangin hma a la a, sum tam tak a sen mek lai hian a dawngtu mipui lamin kan zawm that si loh chuan kawngro a su tak tak thei lo tih leh a hlawhtlinna tur chuan mipui ten mawhphurhna kan nei sang hle a ni tih hre thar leh turin kalkhawm te a chah a. Law Commission Chairman chuan a bial chhungah kum reilote chhunga mipuite chhawr tangkai theih tur Health Clinic pathum lai hawn a ni chu lawmawm a tih thu sawiin Health Minister leh khawtlang mi thahnemngai te hmalakna chhuanawm a tih thu a sawi bawk.

Aizawl East Chief Medical Officer Dr Lalthantluanga pawhin thu sawiin India rama naupang kum khat hnuai lam thi zat tehna Infant Mortality Rate leh nu nauchunga thi, Maternal Mortality Rate ti hniam tura sorkarin hma a lakna kawngah Health Sub Centre leh Clinic te hi a tangkai ber an ni, a ti a. Nu naupai uluk taka enkawl leh natna hrik laka invenna (immunization) an pek thin te, nausen leh naupang hnena natna hrik laka invenna an pek thin te hi ngaih pawimawh na chang tun aia kan hriat a pawimawh hle a ni, a ti.

Health Clinic hawnna inkhawm hi Falkland Local Council Chairman Pu H Malsawmtluanga’n a kaihruai a, Falkland venga tlawmngai pawl hrang hrang YMA, MHIP, MUP leh Local Council Member te an tel a ni.