No.6244/2020-2021

Vawiin chawhnu khan SAD Conference Hall, MINECO-ah Health & Family Welfare Department-in COVID-19 hripui leng dona kawnga an hmalakna bakah Mizoram hriselna atana department chi hrang hrang an thlirho a. Health Minister Dr. R. Lalthangliana'n he hun hi kaihruaiin Health & Family Welfare Board Vice-Chairman Dr. ZR Thiamsanga, MLA bakah Health department hotu pawimawhte an tel a ni.

Vawiin thutkhawmnaah Virus Research and Diagnostic Laboratory (VRDL) bun tura chak taka hmalak a nih thu tarlan a ni a, laboratory awmna tur building sak hna pawh a chanve vel thawh tawh a nih thu tarlan niin a khawl bun tur pawh a rawn thlen kim tawh a, thawktu mi 10 vel mamawh niin anmahni chhawrna tur pawh ICMR hian a tum dawn a, Mizoram sawrkar chuan khawl mamawh bawlhlo man a tum ve thung dawn a ni. Research laboratory-a hman tur a nih angin virus vanga natna hrileng chi hrang hrangte he khawl hmang hian hmuhchhuah theih a ni dawn a, damlo phai lam pan thin engemawzatin pan ngai lovin an chhawr tangkai thei dawn a, daktawrte tan pawh an hnathawh kawngah nasa takin a tanpui thei dawn a ni.

Health Department hnuaia Contact Tracing Team report danin vawiin chhun thleng khan contact tracing-ah mi 19,454 an chhui tawh a, contact tracing tihna a an harsatna tawh te tarlan niin, mitinin a theih chin chinah an veivahna chhinchhiah uluk hram se an duh thu an sawin a, public transport system (City Bus, Taxi, Two-wheeler taxi, Maxicab etc.) a chuangte chuan an chuanna motor number leh an chuan hun chhinchhiah thin se an duh thu an sawi a, a bik takin zirlai sikul kai tan ten hei hi ngai pawimawh se an duh thu an sawi a. Contact tracing tihna a zawhna an zawh ten tha taka an chhan thin avanga lawmawm an tih thu sawiin a pawimawhna hria a zep nei loh a tul tih an sawi a, a tul chuan confidential thil a awm a nih pawhin contact tracing team chu an rintlak a ni tih an sawi bawk.

Public Transport khalhtu leh conductorte pawhin theihtawp chhuaha tan lakpui zel se an duhthu sawiin a theih hram chuan an passenger ten physical distancing an zawm theih nan fimkhur puiah an sawm a ni. Tun dinhmunah Health department contact tracing team-ah volunteers 15 in theihtawp an chhuah a, an chungah an lawm hle tih an sawi bawk.

ZMC laboratory-a thawkte bakah District hrang hrang TrueNAT laboratory a thawkte leh Rapid Antigen Test fehchhuahpuitute thawhrimna ah lawmawm an tih thu an sawi bawk.

Tun dinhmunah Covid Care Centre (CCC) 41 leh Community Covid Care Centre (CCCC) 5 Mizoram pumah a awm thu tarlan niin, Aizawl district bikah 25 a awm mek a, COVID-19 positive 500 vel tum khata enkawlna tur BSUP building, Durtlang ami chu peihfel vek tawh niin an hnawmhnawk (bio-medical waste) phumna tur pawh UD&PA in an lai dawn tih report a ni.

Rapid Antibody Test (RAbT) test kit COVID-19 Mizoramin kan hmelhriat tirh khan thahnemtak lei a nih thu tarlan niin, la hman zawh loh engemawzat la dahthat a awm tih tarlan a ni a, heng Test kit te hi district hrang hranga population-based 'sero survey' neihna tura ruahman niin hei hian community spread a awm leh awm loh chungchangahte leh thil dangah tangkai takin a pui thei dawn tih tarlan a ni.

RAgT hmanga test duh tan awlsam taka test zung zung theihna tur mobile testing "kiosk" bunna tur pawh ruahman fel a nih tawh thu leh, a buatsaihna atana tih tur tul te buaipui mek a nih thu tarlan niin kar lovah hman tan a ni ang.

Heng bakah hian Home Isolation a awm mekte zawm tur SOP chu ennawn a belh ngaite a awm dawn thu tarlan a ni a, Mizoram State Health care Scheme-ah pawh kum hmasa aia inziaklut an thathnem tawh thu tarlan niin, mipuiten ngai pawimawha la inziaklut lo te pawh inziak lut vek se an duh thu an tarlang bawk.

Health Minister chuan COVID-19 positive hmuhchhuah a tlem tak avanga inthlahdah palh a pawi thei tih sawiin, tunlaia Positive hmuhchhuah tharte chu symptom nei an nih tlangpui tawh avangin kan fimkhur lehzual a tul hle a, mahni inringhlel emaw, positive contact nei an awm emaw a nih chuan a rang thei ang bera in test zel a pawimawh tih a sawi a ni.