Vawiin khan Principal Directorate of Health Services a Programme Officers te chuan Director of Health Services Office Chamber-ah tunlaia natna hlauhawm leng mek Ebola chungchang sawihona leh he natna lo thlen ve palh thulha an hma lo lak tawhna te thlir hovin meeting pawimawh tak an nei.
He meeting hi Dr.R.Lalbiakkima, Director, DHME in a kaihruaiin meeting koh a nih chhan leh Sawrkar Laipui duhdana Mizoram pawh kan lo inpuahchah ve mek thu a sawi a. Hemi hnu hian Dr.Pachuau Lalmalsawma, Nodal Officer, IDSP chuan Health & Family Welfare Department-in hma a lo lak tawhna Report a pe . Ebola chu ngaihthah theih loh natna hlauhawm tak a nih avangin Chief Minister leh Health Minister ho pawhin hemi chungchanga hma lo lak lawk dan tur pawh relho a lo nih tawh thu te, Sawrkar Laipui atang pawha Interim Guidelines an dawn tawh thu te a tarlang.
Dr.Pachuau Lalmalsawma chuan Airport zawng zawngah Flight Passenger te chik taka screening neih an nih thu te, a bik takin high risk countries kan tih Ebola Vei tamna atanga lo haw leh zinte uluk lehzuala check an nih mek thu te a sawi a. Hemi hnuah hian hmalakna tura chhawpchhuah hrang hrangte ngaihtuah hovin Ebola natna hi a lo thleng palh thulha a nih pawha ruahmanna an lo siam tawh sa te bakah hmalak chhunzawm zel dan tur an rel ho a ni.
Heng hmalakna tur an chhawpchhuah zingah hian State Referral Hospital, Falkawn chu Ebola vanga damlo te enkawlna atan ruatin mipuiin awlsam zawka department an dawr theihna turin National Ambulance Service Call Centre chu hman ni se tiin an rel. State leh District-ah Rapid Response Team din thar nghalin Dr.K.Ropari, Principal Director, HFW chu State Team Leader niin Team Member te pawh an ruat nghal a. Chutiang bawkin District tina Chief Medical Officer te chu District Team Leader atan ruat nghal an ni bawk. Ebola natna chungchanga mipuite hriattur tlangpui leh sawrkar laipui kaihhruaina te pawh Department Website www.health.mizoram.gov.in -ah tarlan a ni. Ebola hrileng chungchanga inzirtirna pawh zau zawka hmalak zel ni se tiin an rel bawk.
Tun dinhmunah hian Ebola hrileng hian India ram a la rawn thleng lo na in, central sawrkar leh Health & Family welfare Minister te pawh a tul angin an in dawr reng a. Health & Family Welfare Department changtu Minister Pu Lal Thanzara chuan thuthang diklo lakah mipuite chi-ai lo tur leh chutiang a lo awm a nih pawha finfiah hmasa zel turin mipuite a chah a ni.
