No.3807/2020-2021

Aizawl, the 5th August 2020: Nimin July ni 4 (Thawhlehni), 2020, chawhnu khan Dr.F.Lallianhlira Principal Director, Health & Family Welfare office chamber-ah Mizorama nau piang kum khat hnuai lam thihna leh nu nau chunga thihna chhan hrang hrangte zirchianna neih a nih hnu a sawihona Meeting hmasa ber ‘Dissemination Meeting on findings of A Study of factors influencing infant mortality rate and maternal mortality rate in Mizoram’ chu neih a ni.

He hun hi Dr. F.Lallianhlira, Principal Director, Health & Family Welfare Department in a kaihruai a. Dr. John Zohmingthanga, Principal Investigator in he zir bingna an kalpui dan tlangpui report pe in, Dr. Zorinsangi, Public Health Specialist Co- Investigator ni bawkin he zir bingna a an zir chhuah tlangpui report a pe a ni.

He huna tel Health & Family Welfare Officers te chuan sawihona hun hmang chhunzawmin, he an thil zir bingna atanga hmuhchhuah te chu hun lo kal leh tura hriselna kawnga hmalakna tur atana kaihruaitu pawimawh tak tur anih thu sawi an sawi a. Research Team-te chungah lawmthu an sawi bawk.

He zir bingna in a hmuhchhuah tlangpuiah chuan nausen thla khat hnuai lam thihna chhan tam ber chu thla kim lova pian avanga harsatna in a tlakbuak leh thisena infection awm (Neonatal Sepsis) avang te niin, thla khat leh kum khat inkarah erawh chuan Pneumonia chu an thih chhan tam ber a ni. Heng kum khat hnuai lam thihna hi a tam zawk chu an pian atanga darkar 24 chhungin a thleng thin a ni.

Naupang kum khat hnuai lam thihna hi nu in nau a hrin vawikhatna, hringtu nu in thisen sang emaw zunthlum emaw a vei avang te, sahdah hmuam, kuhva ei ching leh zu in thin an nihin a thleng duh bik a ni.

Zir chianna atanga a lan danin nau chunga thihna tam ber chu nau neih zawha thi put vang niin, chung nau chunga thi hmun thuma thena hmun khat chu in lama nau nei te niin, za a sawmli (40%) chauhin an naupai laiin doctor hnen atangin naupai check up an ti a ni.

He zirbingna hi Directorate of Health Services hmalakna niin, Research Team-ah hian doctor pasarih, Research Scholars-te leh Research Assistants 13 an awm a, Mizoram khaw 190 an tlawh chhuak a, Study Participant 1315 awm in, kum khat hnuai lam naupang thi 343 leh nu, nau chunga thi 17 te chu zir bing niin, naupang kum khat hnuai lam dam tha lai 955 te nen khaikhin an ni. Hetiang research lian tham hi Health Department-in a vawikhat neihna ni hial a ngaih a ni. He zir chianna report hian nau piang kum khat hnuai lam thihna leh nu nau chunga thihna tih tlemna kawngah nasa takin kawngro a su ngei dawn niin ngaih a ni.