No.3811/2020-2021

SEDP hnuaia din Health & Family Welfare Board chu vawiin khan SAD Conference Hall, MINECO-ah an Chairman Dr. R. Lalthangliana hovin an thukhawm a, an thu rel pawimawh tak tak zingah Mizoram Health Policy mumal leh felfai tak nei tura hmalak a tel a ni.

Health Minister Dr. R. Lalthangliana chuan National Health Policy awm tho mahse India Constitution a seventh schedule ah “Public health and sanitation; hospitals and dispensaries” chu State sawrkar thuneihna “State subject” hnuaiah dah a ni a. National Health Policy kalh si lovin, Mizorama kan hriselna dinhmun leh hmabak thlir chung si hian target/goal nei a hriselna lama kan thlen chin tur leh kalphung tur mumal taka ruahman a pawimawh a. Hemi atana pawimawh tak Mizoram Health Policy tihlawhtling tur hian a chak thei ang bera hmalak a ni ang, a ti.

Health Minister chuan bungrua leh hmanrua man to tak taka kan lei, kan hmang tangkai hleihtheih siloh te a awm thei a, bungrua lei dawnin engkim ngaihtuah lawk a, a dahna hmun tur te thlengin ngaihtuah lawk a pawimawh a, a dahna tur hmun neih loh avanga bungraw man to leh tangkai tak tak tur pawh hman tangkai hleihtheih lohin a awm palh thei a, bungrua leh hmanraw lei chungchangah department te mumal leh fimkhur zawka kal a tul a ni, a ti bawk.

Vawiina Health & Family Welfare Board thukhawm chuan Health Department hnuaia hmanrua leh bungruate, thawktu mihring zawng zawngte dinhmun leh, awm zat, hnathawhna hmun leh thil pawimawh dangte mumal taka chhinchhiahna tur Inventory Management System neih tul an ti a, awlsam taka bungrua, hmanrua leh thil pawimawh dangte en fel zung zung a nih theih nan database software inventory rang taka neih an rel a ni. Hei bakah hian Hospital Information Management System felfai leh mumal tak neih a tul thu an sawi bawk.

Directorate of Health Services building, MINECO a sak lai mek chungchang sawiho niin, he Directorate hi kum 2014 a sawrkar laipuiin Infant Moratlity Rate tihhniam kawnga Mizoramin a tihthat em avanga lawmpuina sum a pek atanga sak niin a tirah Rs. nuai 650 ruahman a ni a, he building sak zawhna tur hian pawisa mamawh belh a nih vangin, SEDP atanga sak zawhna tur pawisa hmuh a nih theih nan a tul anga hmalak rel a ni.

Health department-a thawktu indaihlohna nasa lutuk phuhru turin a tul ang anga hmalak tum a ni a, tunah hian Health Department hnuaiah hian post hrang hrang 782 ruak a awm a, Heng zingah hian MBBS – 15, Specialist – 4, Dental Surgeon – 11, AYUSH doctor – 23, Ward Superintendent – 30, Staff Nurse – 161, Communityb Health Officer – 32, Health Supervisor – 94 (Mipa – 52, Hmeichhia – 42), Health Worker – 236 (Mipa – 129, Hmeichhia – 107), Laboratory Technician – 44, X-Ray Technician – 15 leh Group D – 117 a tel a. Daktawr thahnem tak deputation leh chhan dang vanga hmun danga kal an awm nual bawk a ni.

Vawiin thutkhawmah hian nikum October ni 1 (2019) atanga hman tan Revised Mizoram Health Care Scheme hnuaiah October ni 1, 2019 atanga July ni 31, 2020 inkar khan beneficiary 9655 in Rs. 27,16,74,607/- an bill tawh thu tarlan a ni a. Sawrkar hospital ah beneficiary 3555 (35%) in Rs. 5,39,84,159/- (19.9%) an bill a, Private hospital-ah beneficiary 6100 (63.2%) in Rs. 21,76,90,448/- (80.1%) an bill thung.

October ni 1, 2019 atanga July ni 31, 2020 inkara Health Care Scheme chhawr tangkaitu mi 9655 te zingah hian mipa 4505 (46.66%) awmin an bill zat hi Rs. 14,36,32,605/- (52.9%) a ni a, hmeichhia 5150 (53.34%) awmin an bill zat hi Rs. 12,80,42,002/- (47.1%) a ni.

Health Minister chuan SEDP hnuaiah pawh Health Care Scheme (HCS) hi an ngaih pawimawh ber pakhat a ni, tih sawiin Chief Minister Pu Zoramthanga pawhin Health Care Scheme atan hian sum lamah harsatna a awm tur a nilo, tiin a lo sawi hial tawh a ni a ti a. Mipuite pawhin Health Care Scheme tangkaizia hria se, a tam thei ang ber inziaklut se a duh thu a sawi.

Health & Family Welfare Board Vice-Chairman Dr. ZR Thiamsanga pawhin Mizoram hmasawnna tur chuan mipuite an hrisel that a pawimawh a, hemi tur hian Health department pawh thuam chak a tul a ni, a ti a. A bik takin thingtlang hriselna ngaih pawimawh a tul tih sawiin, thingtlang mite dinhmun hi a hmuna kal tan lo chuan hriatthiam pawh a har thei a, inhliam leh damlohna tenau ah ringawt pawh khaw danga inentir tura kal a ngai thinte hi an lainatawm a, khaw tinah Health Centre din thei ila, tih hi kan duhthusam a ni, a ti a. 

Health Centre kan neih sa pawh kan luah kim zo lo a, Health department tihchangtlun lehzual hi a pawimawh takzet a, Health Policy nei tura thutlukna kan siam hian a tha zawng leh hmasawn chak zawk turin ke min pen tir ngei ka beisei a ni, a ti.