No.5602/2020-2021

Dated Champhai, the 30th September, 2020: Vawiin khan Dr. Z.R. Thiamsanga MLA, Vice Chairman, Health & Family Welfare Board, Government of Mizoram chuan Champhai District Hospital-a TrueNat Laboratory bun thar chu khuallian niin a hawng. He hunah hian Champhai Bawrhsap Pi Maria C.T Zuali chu khualzahawm a ni.

Khuallian Dr. Z.R. Thiamsanga chuan District Hospital Champhaia TrueNat khawl hawn ani thei chu lawmawm a tih thu sawiin, hlawhtling taka bunfel anih theihna kawnga thathawhtu zawng zawngte fakawm a tih thu a sawi a. Sawrkarin Covid-19 inkaihhruaina a thlah dul mek zel karah hri laka kan State himna turin puipunnate khap chhunzawm zel anih thu sawiin, Covid-19 hri vanga thi an la awm lo chu Pathian venna leh kan zavaia tanhona vang liau liau ani, a ti a. Ram hruaituten tumah thliar bik awm lovin tan an la a, ral hmatawnga ding frontline worker, Sawrkar hnathawk, NGO, Media te tang ho tlangin tun hun hi kan thlen theih phah a ni, a ti bawk.

Vice Chairman Health & Family Welfare Board chuan nitin eizawnna leh khawsak phungte ti bahlah lova Covid-19 nena chenho thiam angaih thu sawiin, Sawrkarin inkhaihhruaina a siamte erawh tha taka zawm angai a ni, a ti a. Sawrkar hotu Chief Minister leh Health Minister te hmalakna hmanga district tina TrueNat Lab bun ani chu lawmawm a tih thu sawiin, nikhatah sample 40-50 test theih tura beisei anih thu leh Covid-19 mai nilo natna dang 20 chuang test theih anih dawn thu a sawi a. ZMC Laboratory-ah RT-PCR khawl 3 bun niin, nikhatah a tam berah sample 1500 thlenga test theih a ni a, district tina TrueNat Lab te nen test tam tak a tih theih tawh a, ICMR in test tur Criteria anga a tihte ah test man lak a ni lo, a ti bawk. District Hospital hmasawn nan theihtawp chhuah tum anih thu pawh tarlangin, Primary Health Care tihchangtlun tum a ni a, Sub Centre te Health and Wellness Centre a hlankai vek tum ani a, Sub Centre awmlohna khuaah Health Clinic buatsaih thin ani ang, a ti bawk. A bial chhunga Health Centre awm lohna zawng zawngah Health Worker dah tuma ruahmanna siam anih thu a sawi a. Champhai North bialtu MLA chuan Champhai khawpui chu Clean Beautiful & Healthy Champhai Project hnuaiah khawpui fai, mawi leh hrisel zawka siam tum anih thu a sawi bawk.

Khualzahawm Pi Maria C.T Zuali chuan TrueNat khawl chu duh anga hmaa hawn ni thei chiah lo mahse a tul anga hman chhoh zel a lo nih tawh thu sawiin, TrueNat khawl buna hman tangkai anih theihna tura Sawrkar hmalakna fakin, Health Care Infrastructure a bik takin Primary Health Care tihchangtlun angaih thu a sawi a. Covid-19 dona kawnga ral hmatawnga ding hmanrua nei thalo chung chung pawha thawktute chu fakawm a ti a. Hrisel turin faina kawnga hmasawn angaih thu sawiin, damdawiin fai, thianghlim leh mawi siam tura hmalak tum anih thu a sawi bawk.

TrueNat khawl hawnna hun hi Dr. Zatluanga, DMS Champhai chuan a kaihruai a. Dr.R.Vanlalchhuangi, MO, incharge TrueNat Laboratory chuan technical report a pe a. Health Family Welfare Board Vice Chairman hovin 20.6.2020 ah TrueNat khawl bunna tur Dental OPD Building hmunhma en ho anih hnuah Biosafety Level 2 a hlangkai tura hmalak tan anih thu a sawi a. District Hospital Champhai atangin thawktu mi 5 te Aug Ni 13, 2020 ah TrueNat Training nei tura Lunglei a tirh an nih thu a sawi a. August Ni 24, 2020 ah TrueNat khawl bunfel niin a tukah mithiam lokal ten an endik nghal thu a sawi a. September Ni 14,2020 atangin Covid-19 sample te endik tan niin a tanniah sample 6 endik a ni, a ti a. Vawiin September Ni 30,2020 thlenga sample endik 88 atangin Covid-19 positive 3 hmuhchhuah anih tawh thu tarlangin result-te ICMR Portal ah online a thehluh thin anih thu a sawi bawk.

Vawiin TrueNat khawl hawnna hunah hian Pu Rex Zarzoliana Vanchhawng SP, Pu R.Lalnghakliana Addl DC & PD DRDA, Dr. R.Lianmawia CMO, Official dangte, Media leh khawtlang hruaitute an tel a ni.