No.1303/2020-2021

Vawiin khan Directorate of Health & Family Welfare atanga Deparment mi pawimawh an tirhte chuan Lengpui thlawhna tum hmuna thlawhna chuang (passenger-te) lo dawnsawn dan tur a hmunah kalin ruahmanna uluk zawkin an siam a, damdawi lam hmanraw thleng thar an dawngsawng nghal bawk.

Sawrkar laipui ruahmanna angin kar leh May ni 26 atanga Thlawhna (Air India) thlawhtir tan a nih dawn avangin hripui laka Mizoram a him zel theihna atan Directorate of Health & Family Welfare te chuan ruahmanna fel tak siam turin vawiin khan a hmun ngeiah kalin thlawhna a chuangte dawnsawn dan tur ruahmanna felfai thei ang berin an duang a. Heng an ruahmamna te hi office lamah ennawn leh turin an dah a ni.

Health Department hotute hian Lengpui thlawhna tumhmunah hripui laka invenna atana hmanraw mamawh chi hrang hrang tam tham tak bâwm (consignment box) 101 rawn thleng thar an lo dawngsawng nghal a. Heng hmanraw rawn thleng zingah hian mihring thawk pekna (Ventilators) 5, mihring tuam himna (Personal Protective Equipment) 2000, Hri enna (PCL Rapid Test Kits) 13000, N 95 hmai tuamna (Mask) 5000 leh hmanraw dang tam tak a tel a ni.

Vawiina Lengpui thlawhna tumhmuna Health Department mi pawimawh kalte hi Director Dr Lalchungnunga’n a ho a. Dr Eric Zomawia Mission Director, Dr Pachuau Lalmalsawma SNO IDSP leh Dr Vanlalrengpuia Chinzah, Convener, COVID 19 Data Management Unit te an tel bawk a ni.