4138/2024-2025

Dated Aizawl: the 07 February 2025 : Vawiin khan Health & Family Welfare Department chuan Assembly Annexe Conference Hall ah Nunphung Hrisel inzirtirna leh chumi atana inbuatsaihdan tur 'Special Workshop on Promoting Healthy Lifestyle: A journey towards Well-being' hun an hmang a.

He hunah hian Dr. Vanlalsawma, Principal Director, Health & Family Welfare Department chuan kalkhawmte hmaah thusawiin tunlai a Mizorama thihna leh natna, thisensang, zunhlum, cancer, stroke leh lungphuchawl in zofate min run nasat thu bakah, social media chak tawh zia leh influencer-te pawimawhna te a tarlang a. department in program hrang hranga hna a thawhnaah te pawh milarte nen a thawhho thiam a tul tawh zia tarlangin, milarte pawhin anmahni theihna zawn theuhah Department-te chu thawhhopui thin turin a sawm nghal a ni.

Dr. Eric Zomawia, Project Director, MHSSP & Mission Director, NHM pawhin Presentation pein, kalkhawmte hmaah hian nunphung hrisel ngaihpawimawh tawk loh avanga natna leh a hunloa thihna awmchhante a sawifiah a. Mimal tin ten mahni kan inven theih dan kawngte a sawi nghal bawk a. Ruth Lalawmpuii, Consultant, MHSSP pawhin Community Intervention – Damna Kawl Eng hnathawh dan sawiin, chumi kal tlanga district paruk (6)-a khaw 510-ah hmalakna kalpui mek a nihdan report-te a pe a. WALKATHON – 2025 buatsaih thuai a nih tur thu leh a kalphung turte a tarlang nghal bawk.

Hemi hnu hian Dr. Zorinsangi, Asst Director ( Procurement) DHS, Health & Family Welfare Department chuan Healthy Ambassador-te thutiam lakpuina hun a hmang a. Dr. Lalnuntluangi, Deputy Director, MHSSP chuan lawmthu sawiin, kalkhawmte tan Free health screening nei a hun hi khar zui nghal a ni.

Vawiina hun hmannaah  hian Mizorama mi lar leh entawntlak thlan bik, thiamna hrang hrang neite kalkhawmin, an ni hi nunphung hrisel neih kawnga entawn tur (Healthy Lifestyle Ambassador) atana ruat nghal an ni.