No.6391/2020-2021  

Vawiin chawhnu khan SAD Conference Hall, MINECO-ah Health & Family Welfare department-in COVID-19 dona kawnga an inbuatsaihna te an thlirho. Health Minister Dr. R. Lalthangliana'n he hun hi kaihruaiin, Medical operational Team on COVID-19 Vice-Chairman Dr. ZR Thiamsanga, MLA bakah health department official pawimawhte an tel a ni.

Health Minister chuan COVID-19 hri kai nunna chan awm lo tura theihtawp chhuah a nih thu sawiin, vawiin chhuna Mizoram chhunga COVID-19 positive nunna chan kan nei ta chu thinlung taka hrehawm a tih thu a sawi a, anmahni enkawltuten theihtawp tak meuh an chhuah tih sawiin, enkawltute chungah lawmthu a sawi a, nunna chan ta chhungte a tawrhpui thu a sawi. Meeting tan dawn hian nunna chan ta sun nan ngawi rengin minute khat an ding a, Dr. ZR Thiamsanga'n tawngtaina hun a hmang a ni. Hrikai enkawl mekte an damchhuah theih nan theihtawp an chhuah zel tur thu an sawi bawk.

Vawiin thlirhona ah hian tun dinhmunah PPE stock a awm that thu tarlan a ni a. RAgT kit 10,820 leh PPE kit 4000 lei belh turin ruahmanna siam a nih thu leh sawrkara thuneitute phalna lak a nih veleh bawhzui nghal theih a nih thu tarlan a ni. ZMC laboratory a sample test chungchangah tluang taka kalpui a nih thu leh harsatna a awm rih loh thu report a ni bawk. Civil Hospital, Aizawl-ah COVID-19 screening point 5 siam a nih thu tarlan a ni a. Hospital Infection Control Committee din a nih thu leh Civil hospital thianghlimna tura hmalak reng a nih thu tarlan a ni.

Rapid Antibody Test kit lei khawlsa pawh Sero-surveillance tih nan hman tum an nih thu leh reilote ah hei hi kalpui turin  inbuatsaih a nih thu report a ni a. Health department contact tracing team-in tun thlengin mi 22,492 an chhui tawh thu an tarlang a, Tun thla chhungin zirna in atanga COVID-19 positive 54 hmuhchhuah a nih thu leh, Office kaihhnawih COVID-19 positive 33 hmuhchhuah a nih thu tarlan a ni a. Hri an kaina chhuichhuah theihloh mi 51 an awm tawh thu tarlan a ni a. Sulhnu mobile application sawrkarin install tura thupek a chhuah chu smartphone hmang zawng zawng ten chhawr tangkai se contact tracing ang a tangkai theih an rin thu an sawi bawk a ni.

IDSP in private hospital RAgT tih phalna a peka laboratory technician te training pek an nih thu an sawi a. Public Transport lirthei khalhtute RAgT hmanga sample test theih dan kawng awm se a pawimawh thu sawilan a ni a, COVID-19 positive nilo, non-covid patient te ngaihthah loh a tul thu sawi lan a ni bawk.