No.2511/2020-2020 

Health & Family Welfare Minister Dr. R. Lalthangliana chuan RT-PCR khawl hmanga ZMC laboratory a swab sample test tur dawn te test kim zawh thawkhat an nih thu vawiin khan sawiin, Lunglei-a TrueNAT khawl hmanga swab sample test pawh tluang takin kalpui zel a ni, a ti a. Chief Minister Pu Zoramthanga ruahman angin Mizoram district tinah TrueNAT Quattro khawl dah a nih tur thu a sawi bawk.

Health Minister chuan mi thahnemngai ten RT-PCR khawl an donate duh thu sawrkarah an rawn thlen thin a, an thahnemngaihna a fakawm rualin inthlahrung taka kan hnar  a ngai thin a ni, a ti a. RT-PCR khawl hi lei mai theih pawh  ni se a khawl mai bakah hian ken tel tam tak a nei a, mithiamte chhut dan chuan khawl bun tur hian RT-PCR khawl nuai 20 man vel chhut telin a vain Rs nuai 100 vel sen a ngai a ni, a ti a. He khawl hi Medical College, University, Science College leh Central Research Institution Laboratory nei ah te RT-PCR hi harsatna awm lem lovin a dah theih mai a, Indian Council of Medical Research (ICMR) hian Hetiang institution-based nilo damdawi in emaw hmun danga RT-PCR khawl bun tur chuan nikhatah sample 100 test ziah tur a ni, tih dan an lo nei a. Sample test tura bawlhlo ngai zawng zawng nen nikhata sample 100 test na man hi cheng nuai 7 vel a nih thu mithiam ten an sawi, tiin hetianga nitin test theih loh chuan ICMR hian test kalpui phalna licence an tihtawp sak thin a ni a ti a. Heng bakah hian khawl dahna tur laboratory siam a hautak em em a, a enkawltu tur darktawr, Scientist leh Lab Technician bakah midang thahnem tak a mamawh a, full time a vil tur chuan ZMC laboratory a khawl pakhat pawh saw mi 25 bawr velin an buaipui a ngai a ni a ti.

Hetih mek lai hian RT-PCR khawl ang tluk tho a tha leh hman senso hautak lo zawk, ICMR pawhin a phal thlap TrueNAT Quattro chu district tinah dah tum a ni a, nikhatah sample 45-50 vel a test theih bakah sample test nan hian darkar khat vel bak a ngai lova, COVID-19 bakah natna dang tam tak test theih a ni dawn a, a tangkai dawn hle a ni, a ti.

COVID-19 vei te an dam chhoh zel thu sawiin Health Minister chuan an zavaia dam taka damdawi in an chhuahsan ngei a beisei thu a sawi a,  COVID-19 vei hmuhchhuah tawh zawng zawng hi 148 an ni a, tunah hian an test negative tawh, mahse dam fel tawh a puan theih rih lo engemaw zat kan nei mek bawk a, mipuiten kan hriat tur pawimawh chu  negative dik tak “True Negative” ti a puang tur chuan anmahni enkawltu damdawi lam mithiam ten uluk taka an vil hnu a, damdawi in atanga an dam fel tawh a ni tih hriattirna “discharge card” an pek hma chuan vei tawhlo emaw damfel tawh ti a puan theih a ni lova, hetiang thilah chuan sawrkar thu leh hla ngai pawimawh a, sawrkarin puang tura a ruat ten an puan chin chiah hi lo ngai chang thin turin mipuite a ngen a ni.

Minister chuan Sample test tur hlawm lian kan zo fel tawh a, kan quarantine facility hrang hrangte pawh a ruak chho tan mek zel a, tangkhang lo haw tur an tlem tial tial a, sample test hna pawh a hautak lo chho zel dawn a. Tunah hian Lawngtlai, Saitual leh Hnathial District te chu COVID-19 vei awm lohna COVID19-free district ah kan puang thei ta hi a lawmawm a ni, a ti a. Hetih mek lai hian kan thla a muang sual ang tih a hlauhawm a, COVID-19 vei kan neih te an dam chho zel a, vei thar hmuh chhuah kan nei tlem telh telh a, amaherawhchu he natna hian min kian san mai dawnlo tih kan hriat reng a ngai a ni, a t a. India ramah tukin thlenga Health Ministry record ah COVID19 vei nuai 5 kan tling tawh a, khawvel pumah a vei tam pali na kan ni mek a, thla hmasa lam kha chuan India rama ni khata vei pun dan hi 4000-5000 vel te a nih thin laiin tun hnai kar hnih chho vel chu nitin sing chuangin an pung reng a, a punna hi a sang telh telh a, nimina India rama Covid19 vei hmuhchhuah thar chu 18,552 a lo ni ta reng mai a ni; hei vang hian thlamuang taka lo awm ngawt hi a theih loh a, India ramah a vawrtawp “a peak”  hun an tih hi kan la thlenglo an ti lehnghal a,kan fimkhur a la ngai nasa em a ni, a ti.

Kan thenawm State Assam ah pawh an thla a muang sual deuh ni in a hriat a, a bik takin Guwahati ah phei chuan Thawhtanni lo awm tur atanga karhnih chhung chu total lockdown an neih a ngai dawn a ni. Hei hi a chhan chu June ni 15 leh 25 inkar, ni 10 chhung lek khan Guwahati bikah positive 762 hmuh an ni a, an zinga 677 (88.84%) hi travel history neilo an ni, a ti a. Khawi ah hian nge kua a rawn hreuh dawn keini pawhin kan hrelo a, inven fimkhur hi kan tih theih awmchhun a ni a ti.

Natna chimawm leh hriatchian hleihtheih loh kan hmachhawn lai mek hi a ni tlat mai si a, kan fimkhur hle a ngai a, sawrkarin tih tur leh tih loh tur a ruahman te tha taka kan zawm reng a pawimawh rih dawn a, mipuite pawhin dawhtheihna kan neih a ngai a, kan hotuten kan tana thalo turin ro an rel dawn lova, thil tam tak ngaihtuah a, kil tin atanga an thlir hnu ah ruahmanna an siam thin tih hria ila, I ring ngam ang u, tiin mipui te a chah a ni.