851/2026-2027

Dated Aizawl, the 5th June 2026:  Vawiin khan Health & Family Welfare Minister Pi Lalrinpuii chuan Indian Oil Corporation Limited (IOCL)-in Corporate Social Responsibility (CSR) initiative hnuaia Zoram Medical College & Hospital-a damlo na zual enkawlna tur khawl changkang (critical care equipment) leh advanced life support ambulance an hlanna (donation) inkhawm ‘asset handing over ceremony’ chu khuallain niin a hmanpui.

Medical Superintendent, ZMC&H pisaa khawl inhlanchhawn pual inkhawm buatsaihah Minister Pi Lalrinpuii chuan Indian Oil Corporation Limited te chungah lawmthu sawiin Mizoram Healthcare Service hmasawn zelna atan cheng ₹62,38,548/- zet hu (C-arm machine, Diathermy Machine leh advanced life support ambulance) hmanga an puihna chu khawtlang hriselna leh damlote himna an ngaihpawimawhzia tilangtu a ni, a ti a. He an thilpek hlu tak hi hmanrua a nih mai bakah, Mizoram mipuite nunna chhanhimna te, rikrum thila rang zawka inenkawlna leh surgery (inzaina) lama ram hmasawnna atana investment pawimawh tak a nih thu a sawi bawk.

Pi Lalrinpuii chuan Mizoramin neurosurgery lama hmasawnna tur an la ngahzia sawiin damlo neurosurgical care lam mamawhte chuan loh theih lohna avangin state pawn lama inenkawlna an zawn a ngai thin, a ti a. Neurosurgery Unit dinna tur proposal (rawtna) pawh siam fel a nih tawh thu leh hemi atan pawha khawl bungrua an la mamawh thu te sawi bawkin Indian Oil Corporation Limited-te chu nakin zel atan pawh thawhpuiah a sawm a ni.

He hunah hian IOCL Chief Manager (HR-CSR) Pi Malati Malakar chu khual zahawm niin thu a sawi a. He hun hlu tak hi Mizoram Healthcare System-in hma a sawn zelna atana lungphum pawimawh tak a ni, a ti a. Indian Oil Corporation Ltd. chuan India hmarchhak state-te chu an ngaihpawimawhzia tarlangin sawkar danin Corporate Social Responsibility (CSR) hnuaia corporation-te a phut thin: an hlawkna tel (profit) atanga za zela pahnih (2%) khawtlang hmasawnna atana hman tur aia tam an pekchhuah thin thu a sawi a. Mizoram mipuite chuan healthcare chu an dikna chanvo a ni tih hre reng tura chahin hun lo kal zel turah pawh thawhhona tha tak an neih chhunzawm zel a beisei tih a sawi bawk a ni. \C-Arm Machine hian Orthopaedics (ruh), General Surgery, Urology leh Trauma Care lamah puiin, diathermy machine hian surgery him zawk neihna kawngah nasa takin a pui thei dawn a, advanced life support ambulance hian damlo dinhmun hlauhawma dingte him leh rang zawka phurhna leh ambulance chhunga treatment pek theihna kawngah a pui thei dawn a ni.\He ceremony hi Indian Oil Corporation Limited (OICL) official thenkhatte chuan lo telpuiin, Zoram Medical College & Hospital Director Prof. Zoramthanga Zadeng chuan lawmthu sawina a nei a, he inkhawm hi a khar a ni.