No.4408/2020-2021 

Aizawl, the 23^rd August 2020 : Vawiin chawhnu khan Health & Family Welfare Minister Dr. R. Lalthangliana hovin SAD Conference Hall, MINECO-ah COVID-19 hrileng dona kawnga hmalakna leh ruahmanna te thlirletna neih a ni.

Health & Family Welfare Minister Dr. Lalthangliana chuan COVID-19 hrileng dona kawngah theitawp chhuaha tang tlangin kan do a, that lam kan pan emaw kan tih mek laiin nitin vei thar an pung chho zel a, kan dinhmun hi sawithiam a har a, thil thleng te ngaihtuahin a tlachawpa ruahmanna te her rem zel a ngai thin a ni, a ti. Tun dinhmunah a bik takin Aizawl khawpui, Kolasib tlangdung leh Darlawn leh Sawleng te contact tracing ah a bika ngaihpawimawh a tul avangin Kolasib DC  leh CMO bakah Aizawl (East) leh Aizawl (West) CMO te chu meeting ah hian tel tura sawm an nih thu a sawi a. Karleh maia Local Council leh Village Council inthlanna lo awm tur chungchang pawh sawi lan niin ruahmanna mumal leh fimkhur thei ang bera siam a pawimawh thu an sawi a ni.  

Medical Operational Team Chairman Dr. ZR Thiamsanga chuan tuna contact tracing kalpui mek chu ennawn a tha em tih zawhna siamin eng chen nge contact tracing hi huam tir a nih dawn tih chu sawiho tha a tih thu a sawi a. Chhiatni/thatni inkaihhruaina Sawrkarin a siam chuan mipui zawm a hlawh lo hle a, hmun tam takah he kaihhruaina dan hi kan bawhchhia a, tun aia khauh leh zawka kan kalpui hi kan zavaia himna atan a tul takzet a ni, a ti.

Chief Secretary Pu Lalnunmawia Chuaungo chuan Aizawl Municipal Area inkharkhipna kalpui mek naktuk zinga tawp tur chu mipui mimir chhuah huk khuahkhirh nan a fimkhur thu hlaah a tul dana zirin mipui chetvel dan kaihhruaina engemaw siam a tul mai thei tih a sawi a. Nitin mamawh nilo non-essential commodities chu Mizoram ah kar hnih chuang a lo lut tawh lo tih sawiin, Non-Essential Commodities kalkawng a tangkhang mekte tan rawn inphurhluh hun engemaw chen kan hawn a tul dawn a, hemi chungchangah hian ruahmanna siam vat a tul a ni, a ti. Bank, petrol pump leh gas semnaa thawkte chu an hna in a zir avangin hrileng kai awlsam zual bik dinhmunah an ding a, sample test chungchangah pawh ngaih pawimawh zual bik an tul a ni, a ti.

Health Secretary Pu H. Lalengmawia chuan Covid Care Centre (CCC) dinhmunte tarlangin tunah hian Mizoram puma CCC hrang hrangah khum 896 a awm mek a. Hei bakah hian CCC a tam thei ang ber a awm thei nan a hmunhma tur hrang hrang dapin ruahmanna siam zel mek a ni, a ti. Medical lam hnathawkte indaihlohna pawh sukiang turin a thei ang angin hma lak zel a ni a ti bawk.

Meeting ah hian Local Council leh Village Council inthlanna lo awm turah a fimkhur thei ang bera inthlanna buatsaih leh inpuahchah a tul tih chu uar taka sawi niin, Aizawl DC chuan hemi chungchanga hma lak an tum dan te meeting ah hian a tarlang a ni.

Meeting ah hian Health leh Police lamin tunhnaia Zangena Petrol pump, Rangvamual leh Darlawn leh Sawleng ah te positive case hmuhchhuah a nih hnua Contact Tracing an kalpui dan te an tarlang a, chhui zuina fumfe neih a har chungin theihtawp chhuahin an kaina ni awmte an chhui zel tih an sawi a.  Rangvamual positive case chungchangah mi 400 chuang test an ni a, result chhuak tawh ah tam ber chu negative an ni a. Darlawn ah vawiin thlengin mi 64 leh Sawleng ah mi 113 swab sample lak tawh niin naktuk lamah Darlawn ah mi 37 leh Sawleng ah mi 96 te sample  lak belh turah ruahman a ni. Zangena petrol pump positive case contact te pawh uluk taka chhui zui mek an nih thu sawilan a ni bawk.

Assam Sawrkar nen inberawna Assam state driver te, COVID-19 positive tunah Thingdawl CCC a enkawl mek chu an state lamah phurh tlak dan chungchang pawh sawiho niin ruahmanna siam a ni.

Meeting ah hian COVID-19 hrileng mek dona atana thil tul tam tak chu zau taka sawiho a ni bawk. Meeting ah hian Home Secretary Pi Lalbiaksangi; Chairperson, Task Group on Quarantine Facilities Pi Esther Lalruatkimi,  Health & Family Welfare Department hotulu leh hnathawktute, Police hotulu te, Kolasib DC aiawh te an tel a ni.