No.1280/2020-2020

Vawiin khan Health & Family Welfare Minister Dr. R. Lalthangliana hovin sawrkar hotu pawimawh ten SAD Conference Hall, MINECO ah Mizoramin COVID-19 a do mek chungchanga thil pawimawh tak tak an sawiho.

Vawiin meeting ah hian Mizoram mi leh sa ram pawna tangkhang lo haw te Mizoram an rawn thlen veleh a Rapid Antibody Test (RAT) tihsak an nih bakah RT-PCR Test tih sak vek chungchang sawiho a ni a, RT-PCR Test tih theihna awmchhun Zoram Medical College, Falkawn-a Testing Laboratory viltu ZMC-a Microbiology department hotute hnen atanga report ngaihthlak a nih hnuah vawiin tlaiah la la hian ZMC-a Microbiology department chu hetiang lama mithiam bikte nen in rawn tlang nghal a, laboratory leh hmanraw neih te thlirin, pooled sample method te pawh hman tangkai dan ngaihtuah tel chunga ruahmanna siam nghal tura tih an ni.

Sawrkar laipui thuchhuakin karleh thawhtanni (May ni 25, 2020) atanga domestic flight chhunzawm theih a tih tak avangin, Lengpui Airport chu hawn phal nghal zingah a tel dawn leh dawn loh hriat la ni rihlo mahse thlawhtheihna hmanga tangkhang lo haw tur leh khualzin rawn haw turte Airport a lo dawnsawn dan tur pawh ngaihtuah nghal a ni a. ILP on arrival at Airport pawh tun dinhmunah chuan tihtawp rih tura tih a ni a, hnamdang mi thlawhtheihna a rawn kal turte chuan an rawn chhuah hma in ILP an lak fel sa ngei ngei a ngai dawn a ni. Thlawhtheihna a tangkhang rawn haw tur reng rengin Home department phalna an lak a ngai dawn a, Airport a rawn thlengte lo en na tur Thermal Camera pawh a rawn thlen tawh thu leh a rang thei ang bera bun tur a nih thu sawi a ni a, RAT screening neih dan tur pawh sawiho a ni.

ZMC Microbiology department ten COVID-19 vei ni a rinhlelh te swab sample an lak thin chu hna a chak zawk nan ZMC-a ENT department in an tih chhunzawm tawh tur thu leh Microbiology department a expert mi 3 te chuan testing laboratory an thutchilh reng tawh tur thu ZMC hotuten an sawi a ni.

Tun dinhmunah Aizawl District-ah Quarantine Facility Sawrkar hmunhma 35 mi 2032 len theihna, Kohhran hrang hrang hmunhma 121 mi 1824 lenna leh hmun dang mi 1294 lenna a awm thu report a ni a. Lunglei district ah Quarantine Facility mi 866 len theihna - Sawrkar hmunhma 20 mi 571 len theihna, Kohhran hrang hrang hmunhma 17 mi 275 lenna leh hmun dang mi 20 lenna, Siaha district ah Quarantine Facility Sawrkar ruahman sa hmun 33 mi 1450 len theihna, Kohhran hrang hrang hmun 3 mi 118 lenna, Champhai district ah Sawrkar ruahmansa (sawrkar hmun leh kohhran hmunhma) 24 mi 824 len theihna bakah hmun dang mi 50 len theihna, Kolasib district ah sawrkar hmunhma 13 mi 677 len theihna, Serchhip district ah sawrkar hmunhma 29 mi 786 len theihna, Lawngtlai district ah sawrkar hmun 19 mi 594 len theihna leh hmun dang mi 25 len theihna, Mamit district ah Sawrkar hmunhma, kohhran hmunhma leh hmun dang 22 mi 700 len theihna leh kohhran hmunhma 6 mi 190 len theihna, Hnahthial district ah sawrkar hmunhma 19 mi 228 len theihna, Khawzawl district ah Sawrkar hmunhma leh hmun dang 39 mi 640 len theihna, Saitual district ah sawrkar hmunhma leh hmun dang 36 mi 647 len theihna te ruahman fel a nih tawh thu Task Group on Quarantine Facilities in an report a, hei bakah hian Aizawl district ah sawrkar sikul hrang hrang Quarantine Facility atana hman tura siam theih tur an thlithlai mek thu an sawi bawk.

Tangkhang Mizoram pawna rawn haw tur hnaivai zingah zanin hian Telengana state atangin mi 630 Hyderabad rail station atanga an rawn chhuah tur thu leh May ni 24 ah Silchar an rawn thlen beisei a nih thu sawi a ni a, Bairabi thlenga rawn kal tir dan dap mek a nih thu sawi a ni bawk. Kerala atangin mi 129 May ni 23 hian an lo chhuak dawn a, May ni 26 ah Badarpur rel station an rawn thleng dawn a, anni hruai dan tur hi sawrkarin a ruahman dawn a ni. May ni 25 hian Karnataka a tangkhang mi 1500 velin Bangalore rail station chhuahsan in May ni 28 hian Bairabi an rawn thlen beisei a ni a, May ni 22 hian Odisha a tangkhang mi 23 chuan bus a rawn chhuakin May ni 25 ah vairengte an rawn thlen beisei a ni.

Tangkhang lo haw tur chungchangah hian tum khata lo haw tur an tam a train a book full theih chuan Bairabi thleng rawn tlang dan a awm a, hetiang a nih loh chuan kan thenawm state te nen inrawn tlanga ruahmanna siam a ngaih thin thu tarlan a ni.