680/2022-2023 

Aizawl, the 28^thMay 2022 : Health & Family Welfare Minister Dr. R. Lalthangliana’n vawiin khan Mizoram State Cancer Institute a cancer hemna khawl chi khat – Brachytherapy Machine bun thar a hawng a. Khawl thar hawnna ah Health & Family Welfare Board Vice Chairman Dr. ZR Thiamsanga MLA pawh telin Minister hi Secretary, Health & Family Welfare Pu R. Lalramnghaka, IAS; Principal Director Dr. T. Lalhmangaihi; NHM Mission Director Dr Eric Zomawia leh official dangten an tawiawm a ni.

Dr. R. Lalthangliana’n Mizoram ah cancer vei kan tam avangin kawng tin rengah tan lak a ngai hle tiin ei leh in uluk leh fimkhur te, zuk leh hmuam lama fihlim a pawimawh zia te, taksa insawizawi a tul zia te kan hriatsa vek ni mahse hriselna kawngah hengte hian nghawng thui tak an neih avangin a pawimawh reng a ni, a ti a. Hmanni lawka cancer hemna khawl changkang tak Linear Accelerator hman theih tura hawn leh tuna Brachytherapy machine thar hian MSIC chu a tichangtlung hlein cancer damlo te tan damna an chan theihna tur kawng thar nia a ngaih thu sawiin khawl bun thar pan ngai erawh a tlem thei ang ber nei ila tih chu duhthusam a ni, a ti. 

Health Minister chuan Japan International Agency Cooperation (JICA) tanpuina leh an sum puk hmanga sak beisei hei aia lian leh changtlung zawk,Cancer Superspeciality Hospital din turah Sawrkar Laipui phalna leh a kaihhnawih tihfel ngai khirkhan tak tak te chu chinfel a nih tawh thusawiin tunah chuan JICA leh Mizoram Sawrkar inkar a ni tawh a, JICA lamin an sawi dan chuan he Hospital hi 2028 ah sak zawh hman an beisei a, a tira hemi atan sum ruahman cheng vaibelchhe 500 chu tunah chuan tisang in, cheng vaibelchhe 660 ah san a ni tawh a ni, a ti. 

Dr. ZR Thiamsanga pawhin thusawiin cancer vei te hma taka hriatchhuah an nih theih nan cancer screening te zau taka kalpui a tul thu te a sawi a. Khawl thar bun chu cancer inenkawlna lamah bung thar kaina a ni tiin cancer lama thawktute inpekna leh thawhrimna chu fakawm a tih thu a sawi. 

Secretary, Health & Family Welfare, Pu R. Lalramnghaka chuan lawmna thu sawiin Dr. Lalhlupuii, Radiation Oncologist in khawl thar bun chanchin te, cancer a hem theih dante leh a tangkai dante sawiin report a pe a. Dr. Zoramthanga Director, MSCI in lawmthu a sawi. Brachytherapy khawl thar hi khawl room ah MSCI Chaplian Rev. K. Lalpiangthara’n tawngtaina nen Pathian hnena hlanna a nei a ni. 

Brachytherapy khawl bun thar hi cheng vaibelchhe 3.02 man niin Varian Medical Systems USA siam a ni a. MSCI ah hian tun hmain channel 3 awmna Brachytherapy khawl company dang siam hman a ni thin a, channel thum nei a nih avangin cancer a hem theih pawh a tlem a. Tunah khawl thar hi chuan channel 24 a neih avangin cancer chi hrang hrang a hem thei a, a enkawl theih pawh a tam sawt dawn a, cancer vei enkawlna kawngah a tangkai hle dawn a ni.

Tarlan tawh angin nikum September khan MSCI ah cancer hemna khawl lian leh changkang tak India hmunpui ah te pawh an hman ber Truebeam Linear Accelerator (LINAC) bun chu Chief Minister Pu Zoramthanga’n a hawng. He khawl leina leh a chah thlenna atan hian cheng vaibelchhe 17 chuang sen niin a dahna hmun tur leh thil dang a ken tel te nen chuan cheng vaibelchhe hu 22 man vel nia chhut a ni. 

LINAC chuan taksa pawn atangin boruak kaltlangin cancer a hem a, Brachytherapy khawl erawh chuan cancer hi hnaite emaw a cancer awmna lai emaw depin a hem a. Barchytherapy hi a bik takin prostrate cancer, chhul cancer cervical cancer, ka chhung cancer oral cancer, aw bawm leh hnar bulhnai cancer nasophrayrnx cancer  ah te a tangkai hle a, cancer timur hnaite a hem avangin taksa timur pangngai healthy tissue, a khawih tlem in radiation lakah healthy tissue te hi a him a ni.

Cancer enkawl leh tihdam hi thlur lian deuh deuh 3 in a kal a, chungte chu – cancer damdawi khai (chemotherapy); zai a cancer paih (surgery) leh cancer lai tihrawl hem (Radiotherapy) te an ni a. Taksa peng hrang hrang, a cancer dan azirin, cancer a taidarh dante leh damlo dinhmun te ngaituahin heng kawng hrang hrangte hi a mal emaw a kawpin emaw hmangin cancer veite hi enkawl an ni thin a ni.

Mizoram State Cancer Institute ah Brachytherapy machine bun thar a hawn hnuin Health Minister Dr. R. Lalthangliana chuan RIPANS a tlawh a. RIPANS tihchangtlunna tur project cheng vaibelchhe 481 hu hnuaia building hrang hrang sak mekte a hmun a tlawh a. He project hnuaiah hian khum 100 awmna Hospital, PG course 7 hawnna tura atan building leh mamawh hrang hrang te, mi 1000 len theihna Auditorium bakah Guest House changtlung tak a tel a, hengte sak mek a ni.