No.2738/2020-2020  

Dated Serchhip, the 4th July, 2020:  Vawiin hian Dr. R. Lalthangliana, Minister, Health & Family Welfare, Higher & Technical Education, Commerce & Industries, etc chuan Hnahthial leh Serchhip a tlawh a. Hnahthialah hian Playground laih mek tlawhin, District Task Force on Covid19 te meeting a neih pui a, kumina a bial chhung, 29-South Tuipui huam chhunga HSLC tithate lawmpuina a hlan bawk. Serchhipah hian Serchhip District Task Force on Covid19 te leh PHC Medical Officers te nena meeting a nei bawk.

 

Minister in Hnahthiala hun a hman chhung hian Pu Robert Romawia Royte, Minister of State, Sports & Youth Services, Tourism, ICT, etc chuan a tawiawm a. A hmasa berin Hnahthial Playground laih hna thawh mek tlawhin hmalaknate an thlir duna. Dr. R. Lalthangliana chuan Sports Minister hmalaknate fakin a remhriatna zarah Hnahthial-in Playground tha tak an neih thuai a rin thu a sawi a. A chungah lawmthu a sawi a ni.

 

Playground a tlawh hnu hian DC Conference Hall ah District Task Force on Covid19 te leh Hnahthial District chhunga PHC viltu Medical Officers te nen meeting an nei a. He hun, Pu Vanlalmawia, DC kaihhruaiah hian Dr. R. Lalthangliana chuan, Mizoram district 11 zinga Covid19 positive la awm lohna district awm chhun Hnahthial District chhunga Covid19 dona kawnga rim taka hnathawktu zawng zawng te chungah lawmthu a sawi a. Covid19 free District an nih lawmpui nan Rs. 1 lakh a hlan a, covid19 thila hmun ruka police duty mekte hnenah thilpek a pe bawk a, Hnahthial district chhunga PHC hrang hrangte hnenah hmanraw thenkhat a hlan bawk a ni. 

 

Thusawiin Minister chuan, he hripui dona kawngah hian mahni zawnah mitinin rim takin hna kan thawk hova, kohhran, NGOs leh mimal in nasa takin sawrkar an thawhpuia. Chung kan thawhrimna te chu Pathianin mal a sawm a,   case kan neih tawh mi 162 zinga mi 127 ten dam takin Damdawiin an chhuahsan thei ta a. Tuna active mek mi 35 te pawhin dam taka an chhuahsan thuai beisei theihin kan dinhmun a hahdam a, a lawmawm em em a ni, a ti a. Covid19 enna khawl Truenat Quattro pawh Chief Minister ruahmanna in district tina dah vek turin chak takin hma kan la mek a, reiloteah district tinin Covid19 test na kan nei thuai dawn a ni, a ti. Minister chuan, TrueNat khawl thatna sawiin Covid test na a nih piah lamah Covid19 hian min lo kiansan hlauh anih pawhin natna dang chi 16 en (test) theihna a ni nghal a, a enkawl turin a hranpaa training leh emaw thiam bik dang rawih ngai lovin doctor (MBBS) leh Lab Technician te an hman mai theih bawk a, a hlu hle dawn a ni, a ti. Tin, Health Department hnuaia thawktu indaihlohna nasa tak awm mekte tihziaawm tuma hmalakna a awm mek laiin Covid19 hripuiin min tlak buak taa, thawktu indaihlohna nasa tak hi sawrkar chuan a hria a ni, a ti a. District thar pathuma district Hospital sakna turte pawh a theih ang anga hmalak zel a nih thu a sawi bawk. 

 

He hunah hian Hnahthial District chhunga PHC pangaa Medical Officers te hnen atangin thusawi tawi ngaihthlak a ni a. Mamawh an neih hrang hrangte chu ziaka thlen turin a hrilh hlawm a ni.

 

Pu Robert Romawia Royte, Minister, Sports & Youth Services, etc pawhin thusawiin, Hnahthial DC office in a mamawh Video Conferencing tih theihna turte, Tourism lama mamawh te, Playground laih mek te chu theihtawp chhuaha hma a lakpui zel tur a sawi a ni. 

 

Minister tawiawmtu Dr. F. Lallianhlira, Principal Director, H&FW pawhin Covid19 chungchanga Mizoram hmalakna leh dinhmun tlangpuite a tarlanga, Hnahthial DLTF aiawhin Dr. Sanglura, MO chuan report a pe a ni.

 

He hun a hman zawh hian DC Conference Hall ah vek hian 29-SouthTuipui huam chhunga kumina HSLC pass zawng zawngte leh a titha zual High School Principal te hnenah lawmpuina thilpek hlanna hun a nei leh a. Za a za (100%) pass school paruk: Southern H/S Hnahthial, Govt. Hnahthial H/S, St. Stephen H/S, Lalhnuni H/S, Tuipui D, Tarpho H/S leh Khawhri H/S Principal te hnenah lawmpuina thuziak leh thilpek a hlan a. He bial chhunga HSLC Pass zawng zawngte chu lawmpuina thuziak leh 'Zirna Kailawn' tih lehkhabu a pe a. Heng lawmpuina thilpek hi zirtirtute hnenah hlanin annin naupangte an hlan chhawng veleh dawn a ni. 

 

Hnahthialah hian Deputy Commissioner Pu Vanlalmawia, Pu Lalbiakkila, SP leh official pawimawh dangten Minister hi an lo dawngsawng a ni.

 

Hnahthiala hun a hman zawh hian Dr. R. Lalthangliana hian Serchhip a pana, Serchhipah hian NGO Coordinaiton Committee te’n Dr. Lalruatliana Pachuau, Surgeon dah thar anih avanga lawmthu sawina lehkha leh pangpar an lo hlan a. Serchhip DC Meeting Room ah DLTF te, district chhunga PHC Medical Officers te leh mi pawimawh dangte nen meeting a nei zui leh a. Er. Lalrinawma, Deputy Speaker leh Tuikum bialtu MLA ni bawk chuan Minister hi a tawiawm a ni.

 

He hun, Serchhip Bawrhsap Pu Kumar Abhishek, IAS kaihhruaiah hian Minister chuan, kan hriat theuh angin thla li chhung zet chu rim takin Covid19 hripui dovin kan lo thawk ta a, chung kan thawhrimna tea  lawmthu sawia Serchhip tlawh a nih thu hrilh a. Chief Minister tha leh inpe tak kan neih vangte, kohhran, tlawmngai pawl leh mimal tam takten tha taka sawrkar an thawhpui zel vangte, mipuiten sawrkar thu tha taka an zawm thin vangtein Covid19 hripui dona kawngah fak tlakin Mizoram kan awm a. Vawiin thlengin state chhungah nunna chan kan la awm lova,  a kai kan neihte an dam chho zel bawk a. A lawmawm em a ni, a ti a. Chief Minister hmalaknaa Covid test-na  TrueNat Quattro khawl pawh hun reiloteah district tina dah vek a nih tur thu a sawi bawk. Dr. R. Lalthangliana hian, Mizoramin hripui dona kawnga hma a lak that dan hi national media te pawhin an ngaihven tih sawiin, Domestic Airport a temperature screening hmasa ber kan ni te, national lockdown puan hmaa lockdown puang kan nihna te, local task force tha tak tak leh inpe tak tak kan neihte leh mahni zawn theuhva theihtawp chhuahtute zawng zawng zara heng hi thleng kan ni, a ti. Tin, tunhnai lawkah Serchhip VC VII ten district hospital hnena Ambulance thar an pek avangin lawmthu a sawi a, Serchhipin Bawrhsap thar an neih avangin a lawmpui thu a tarlang bawk.

 

Minister tawiawmtu Er. Lalrinawma, Dy. Speaker pawh thusawiin, sawrkar hmalakna fel fai, Health Minister chak tak leh kohhran leh tlawmngaipawl ten tha taka sawrkar an thawhpui avangte in Covid19 vang Mizorama damlo te tumah kan la inchan lo thei te leh mipui inkaidarhna laka humhim kan ni rih te hi a lawmawm hle a, hetiang dinhmun duhawm hi kan chhawm zel theih nan mipuiten himna dan te kan zawm zel a pawimawh a ni, a ti.

 

He hunah hian Pu R. Sathyiasundaram, SP, chuan district chhunga venhimna kalpui dan tlangpui report a pe a. Dr. Laldawngliana Sailo, CMO Serchhip leh Pi C. Lalduhzuali, SDO Sadaar ten district chhunga Covid19 donaa hmalak dan te report an pe bawk a. Minister rawn tawiawmtu Dr. F. Lallianhlira, Principal Director, H&FW pawhin state hmalakna tlangpui report a pe a. Dr. Pachuau Malsawma, Nodal Officer, IDSP pawhin thu sawiin; district chhunga PHC hrang hranga medical officers te chu an mamawh tlangpuite zawtin an tana hmanraw thenkhat an ken te a hlan nghal bawk.

 

Serchhipah hian Pu Kumar Abhishek, IAS, DC, Pu R. Sathiyasundaram, IPS, SP leh official pawimawh ten an lo dawngsawng a.

 

Dr. R. Lalthangliana hi Aizawl atangin Pu F. Lallianhlira, Principal Director, H&FW, Dr. Vanlalsawma, Jt. Director (FW), Dr. PC. Lalramliana, Jt. Director, DHME, Dr. Pachuau Malsawma,  Nodal Officer, IDSP, Pi Lalsangpuii, DD, C&I, Dr. Vanlalrengpuia, SPM leh official dangten an rawn tawiawm a ni.

Attachment

  • Loading attachment...