Tukin zing karah khan Dr. R. Lalthangliana, Minister, Health & Family Welfare, Higher & Technical Education, etc., chuan Serchhip tlawhin JN Hospital, Bazar Building, Nursing College leh Girls Hostel sak zawh hlim te leh District Hospital thar hmunhma tura ruahman chhin hmunte a tlawh.

Amah lo dawngsawngtute nena inkawm hona hun CMO Conference Hall a neihah Dr. R. Lalthangliana chuan, Serchhip Hospital in tun dinhmuna a mamawh zual, thil tenau tihnghal mai theih chi te chu ziaka thlen tura hrilhin a theih chin chinah tihsak nghal dan a zawn tur thu a hrilh a. Hospital chu fai a tih thute, Khum 60 chauh a awm erawh chu a la tlem deuh nia a hriat thute sawiin, thawktute chu hna pawimawh tak thawktu an nihna hrereng tur leh an hlim hmel chu damlote tan damdawi tha tak a tling tih hrereng turin a fuih a ni. Hriselna leh damdawiin tihhmasawnna lamah sawrkarin nasa takin hma a la dawn tih sawiin, Health Care Scheme pawh tha tawk tak ruahman chhoh a nih tur thu a sawi a. Sawrkar tharin hun reilote chhunga a hnathawh tlangpui tarlangin, Cabinet Meeting hmasa berah sawrkar Agency kaltlanga zu zawrhna tihtawp a nih thu sawiin, School timing ennawn a nih tur thute, Socio Economic Development Programme (SEDP) hmanga hmasawnna hna kawng hrang hranga thawh tum a nih thute a sawi ani. Ram mipuite leh ram hruaitute inhnaih lehzuala kan thawhho a tul hlea a hriat thu sawiin mipuiten rilrua an vei ram tana tha nia an hriat te chu MLA leh Minister te hnena thlen thin tura ngenin, mipuiten an hna thawk tura an thlan kan ni a an ta kan ni, a ti a. Minister leh MLA te hi mihring ve mai tho kan ni a fel lohna tam tak nei kan ni. Min tawngtai sak fo kan mamawh em em ni, a ti bawk. Dr. R. Lalthangliana hian Hospital hi chipchiar taka a fan bakah damlo awm mekten Krismas an hman na atan Rs. 5000 a hlan nghal a ni.

He mi hnu hian Minister hian Serchhip Bazar Building tlawhin Bazar Building khawchhak lam panga rangva hulhhliap hnuaia inzawrhna chu concrete-a siama, tihzauh a tul hlea a ngaih thu sawiin, Department hotute lo sawipui a tum thu a sawi a ni.

Bazar Building a tlawh zawh hnu hian Serchhip Nursing College Building leh Girls Hostel Building sak zawh hlim, la luah lohte chu a tlawh leh nghal a. A kiang maia District Hospital thar hmun atana ram remchang awm nia sawite pawh a en nghal bawk. Minister hian Nursing College leh Hostel te pawh chu Department hotute nena sawihova hmalak zui dan tur ngaihtuah thuai a nih tur thu a tarlang a ni.

Dr. R. Lalthangliana hi sawrkar thara Serchhip rawn tlawh hmasa bertu Minister niin Serchhip ah hian Tukthuan a ei nghal a. Serchhip IPRO Pu. K. Saitluanga, Serchhip Medical Superintendent Dr. ZD Lalmuanawma, Medical Officer Dr. C. Lalrinzama leh thawktu dangte, Sub Headquarters YMA hruaitute, MJA Serchhip, Village Councils aiawh leh midang thahnem takin  an lo dawngsawng a ni.