2998/2022-2023

Aizawl 9th December 2022: Nimin khan Health & Family Welfare Minister Dr. R. Lalthangliana chuan Sialsuka ‘ZOFEST’ neih mek hun rukna chu khuallian niin a hmanpui a. He hunah hian Lawngtlai East bialtu MLA, Agriculture Development Board Vice Chairman ni bawk Pu H. Biakzaua chuan uaptu niin a hmanpui bawk.

Khuallian Dr. R. Lalthangliana chuan Zofate insuihkhawmna atan Zofest hlawhtling taka buatsaihtu Mizo Zirlai Pawl hruaitute hmalakna chu fakawm a tih thu a sawi a. Zofate chu ramriin then hrang mah se, inpumkhatna leh inunauna te chu then hran theih a ni lo, a ti. Zofa hmun hrang hranga cheng ten harsatna an tawhna chuan inpumkhatna leh inlainatna a tarlan thin thu Minister chuan sawiin, tunhnaia Bangladesh atanga rawn lut te puihna kawngah pawh Mizoram sawrkar chuan theihtawp a chhuah tur thu leh an tawrhnaah chuan tawrhpui zel an inhuam thu a sawi a ni.

Minister chuan Zofate chu hnam tlemte ni mah ila, India leh khawvel ram pum tieng theitu an ni, a ti a. Kum zabi 21-na chu Zofate tan chonaa khat a nih thu sawiin, thu mai ni lo a taka an inbuatsaih a ngai tawh a ni, a ti bawk. Thiamna bik neih ngai thil leh rampum huap inelnaah te ti thei ve tura inngai chunga teirei peihna, dawhtheihna leh taihmakna te nena theihtawp chhuah zel turin kalkhawmte chu a chah a. Hei hian Zofate dinhmun chhanchhuah leh chawikan kawng mai bakah dinhmun pawimawha inhlangkai turin min pui dawn a ni, a ti. Hmangaihna, duhsakna, lainatna leh tih tak takna te nena u leh nau intuamhlawma, ‘Chhul khat kual kan ni’ tih chu Zofest zawh hunah pawh chhawmnung zel turin kalkhawmte chu a chah a ni.

He hunah hian uaptu Pu H. Biakzaua pawhin thusawiin Zofate chu Chhinlung chhuak an ni tih hi hriatreng a ngai, a ti a. Lang lo lama thlahtute thisen hmanga siam leh dinchhuah an nihna hi lanchhuah tir a pawimawh thu sawiin, hei hian Zohnahthlak zawng zamgte chu unau an nih tihlanna kawngah nasa takin a pui dawn a ni, a ti. Hnam leh tawng tam tak bo tawh karah, Zofate hnam ziarang leh tawng a bo ve loh nan thangtharte chu hnam hmasawnna leh thanlenna atan tan la turin a fuih bawk a. Thiamna leh zirna ngaipawimawh a, thawhhona tha nen inpumkhatna kawng zawh zel turin kalkhawmte chu a chah a ni.

Mizo Zirlai Pawl buatsaih ‘Zofest’ hi December ni 6-9 chhunga neih tur a ni a. Vawiin hian Sports and Youth Minister Pu Robert Romawia Royte chuan khuallian niin a hmanpui ang.