No.1695/2021-2022

Aizawl 5th August 2021: Vawiin chawhnu khan Health Minister Dr. R. Lalthangliana hovin SAD Conference Hall, MINECO-ah Mizorama COVID-19 hri leng dinhmun thlirhona nei a ni a. Meetingah hian Home Minister Pu Lalchamliana, Medical Operational Team Chairman Dr. ZR Thiamsanga, MLA, AMC Mayor Lalrinenga Sailo, Chief Secretary Pu Lalnunmawia Chuango bakah DM&R, Home, Health department hotulian te leh Aizawl DC bakah, Indian Medical Association, Aizawl District Local Council Association, MKHC, NGOs leh MBCC aiawhte an tel a ni.

Minister Dr. R. Lalthangliana chuan Mizoram chu India hmarchhak state-ah vaccination drive ti tha ber dawttu kan ni a, mi nuai riat chuangin first dose la tawhin, nuai hnih chuangin double dose an la tawh bawk a ni, a ti a. Tun dinhmunah hian vaccine stock 452500 a awm a, nuai hnih vel beisei belh a nih thu a sawi bawk a. Mipuiten vaccine kan lak a pawimawh thu leh vaccine stock-ah Mizoram sawrkar in buaina a neihloh thu a sawi bawk a ni. Amaherawhchu, tunhnaia economic blockade avanga life saving equipments tam tak kawnga tang te chuan harsatna a siam thu sawiin, ZMC-a Oxygen plant siamna tur a tih khaihlak thu sawiin, chinfel vat a nih a beisei thu a sawi bawk a ni. Hun harsa leh khirh tak kan tawn mek lain RAgT Test Kit 231240 a awm thu a tar lan bakah  RAgT Test Kit nuai 2 chuang erawh a lo thlen belh bawk a ni, a ti a. RtPCR Test Kit chahbelh a nih mek thu leh Bihar a lo thlen tawh thu Minister hian a tarlang bawk a ni. Covid-19 mass test veng/khua 46 ah kalpui tawh a nih thu tarlangin, mi 53598 ah covid-19 positive 1764 hmuhchhuah a ni a, za zelah 3.29 a chhut a ni.  Mass Test bakah hian tluang takin Serial Test veng 19-ah nimin thleng khan kalpui a ni a, mi 2446 test zingah, covid-19 positive 336 hmuhchhuah a ni a, za zel a 30.7 a chhut a ni; Serial Test hi veng 6 in an duh thu sawrkarah an sawi tawh tih a tarlang bawk a ni. Minister chuan tun boruak thlirin Covid Appropriate Behavior uluk taka zawm turin mipuite a chah bawk a ni.

Review Meeting-ah hian harsatna hrang hrang tawh mek leh ngaihdan hrang hrangte sawiho a ni a. Lockdown chungchanga kalzen dan tur thutlukna erawh SEC kut-a dah a ni.