No.2753/2020-2020 

Vawiin ni 04.07.2020 hian Hnahthial khawpuia Infiamna ruhrel siam mek leh siam belh dan turte leh Tourism leh ICT Department hmalakna turte Health Minister Dr R.Lalthangliana leh Sports Minister Robert Romawia Royte ten an en a. Hnahthial DC leh khawtlang hruaituten an lo tawiawm a ni.

Health Minister leh Hnahthial bialtu MLA ni bawk Dr R.Lalthangliana chuan Hnahthial District chu India rampum huap pawha Football thiam lar S.Malsawmtluanga (Mama) leh Jeje Lalpekhlua te chhuahna district a nih avangin Football field tha kan phu a, Sports Minister-in Hnahthiala Sports Complex dah tuma hma a la chho chu a phurpui tak zet tih sawiin, Phullem phahna tur football ground siam mek avangin lawmthu a sawi.

Minister Dr R.Lalthangliana chuan Chief Minister-in thiam takin Sports Minister atan Pu Robert Romawia Royte a ruat a, Mizoram Budget-ah sum tam lo mahse, hun reilote chhungin Mizoram pawn lam atangin hmasawnna sum tam tak a tichhuak a, lo chhuak leh zel tur pawh a awm a, a zarah Mizoram thalaite an vannei chho mek a ni, tiin a sawi.

Hnathial football ground tlawhnaah hian Mizo footballer Jeje Lalpekhlua pawhin Minister-te hi a tawiawm a ni.

Sports Minister Pu Robert Romawia Royte pawhin thu sawiin Mizoram Sports Policy zulzuiin Hnahthial khawpuiah infiamna ruhrel tha siam a pawimawh a, Football field-a Phullem phah hna pawh kumin 2020 chhunga zawh hman a beisei thu a sawi a, Hnahthial District Headquarters-in an mamawh em em Tourist Lodge tha leh DC Office-in an mamawh em em Video conferencing facilities pawh CIC kaltlangin an neih theih nan bawhzui a tum thu a sawi a. Minister chuan Central Sorkarin hmasawnna sum state sorkar kuta a pekte hi hunbi neia hnathawhnaa hman tur a ni a. Mipui an harsat lutuk loh nan lockdown vanglai pawh khan Central sorkar chuan construction hnathawh hi khar lovin a kalpui zel a ni, a ti a. Mizoram-ah Covid-19 avanga Lockdown neih-ah, rei tak hnathawk thei lova kan awm avangin hmanhmawh a tul zual a. Hnathawhna tur Sorkar sum Bank-a dah awl mai mai chi a nilo a, hmasawnna sum tam zawk Mizoram-in a hmuh zel theih nan leh sumin miretheite a thlen theih nan Sorkar a kal chak a tul, a ti a. Sum hmuh hmasakte hman tangkai vat a nih theih nan Covid-19 hrileng karah pawh contractor thlangin Work order tihchhuah zung zung a tul a ni a ti.

Tourism Minister chuan Hmuifang Tourist Resorts tihhmasawn dan tur leh Hmuifang Field lai zau tura hmalak mek dante khawtlang hruaitute a sawipui bawk a ni.