2586/2022-2023
Aizawl the 9th November 2022 : Vawiin khan Mizoram Finance & Accounts Service Association (MFASA) General Conference vawi 27-na chu Aijal Club-ah hman a ni a, H&FW Minister Dr. R. Lalthangliana chu khuallian niin a hmanpui.

MFASA Conference hawnna inkhawm MFASA Vice-President Pu Ramchuana kaihhruaiah Khuallian Dr. R. Lalthangliana chuan thusawiin Finance Department chu Mizoram sawrkar department hrang hrang zingah a pawimawh ber leh mawhphurna sang ber nei, department dang zawng zawngte khaikhawmtu ber a nih avangin theihtawp chhuaha hma la zel turin MFAS officer-te a chah a ni. Mizoram Budget leh sum dang zawng zawng enkawltu an nih avangin tha taka office kal tur te, aikal lak rem lo ber department an nih avangin hriselna ngai pawimawha ram leh hnam tana thawk zel turin duhsakna a hlan a, Accounts & Treasuries Officer awm lohna district-ah pawh an neih thuai a beisei thu a sawi.

Thu a sawi zelnaah Dr. R. Lalthangliana chuan Finance department hmalakna kawng hrang hrang chu tarlangin, a bik takin Covid-19 hluar laia an inpekna chu lawmawm leh entawntlak a ni a ti. Southern Zone, Lunglei-ah Joint Director, Accounts & Treasuries dah a nih chu lawmawm a tih thu sawiin chhimlam a bik takin Lunglei, Lawngtlai leh Siaha district te chuan an chhawr tangkai hle a ni a ti.

Vawiin Conference-ah hian MFASA President Pu Vanlalsawma chuan MF&AS 2022 Batch thar lawmluhna hun a hmang a, MFASA Secretary Pu C. Lungmuanpuia chuan report a pe bawk. Kumin MFASA Conference thurel zingah RBI-a training neih, sawrkar hnathawk pension scheme leh Leave Travel Concession chungchang a tel a. Kum 2022-2023 chhunga MFASA office bearer-te thlan nghal a ni.