2371/2022-2023
Aizawl the 19th October, 2022 : Department of AYUSH, Ministry of Health & Family Welfare, Govt. of India leh Directorate of AYUSH, Govt. of Mizoram tangkawp buatsaih ni thum awh tur ‘AROGYA MELA 2022’ chu vawiin khan Dawrpui Multipurpose Centre, Aizawl-ah Health & Family Welfare Minister Dr. R. Lalthangliana chuan khuallian niin a hawng a. Health & Family Welfare Development Board Vice Chairman Dr. ZR Thiamsanga chu khual zahawm a ni.

Khuallian Dr. R.Lalthangliana chuan Ministry of Health & Family hnuaia hriselna lama tanlakna ruahmanna lian tak pakhat ‘AROGYA Mela 2022’ buatsaihtu te zawng zawng chungah lawmthu a sawi a. He ‘AROGYA MELA 2022' hian a tum ber chu Mizoram mipuite zingah AYUSH vawrh lar leh ramhmul damdawi India ram leh Mizoram hmun tam taka awmsa leh natna tihdam nana tha takte Mizo mipuite hnena hrilhhriat leh zirtir a ni a ti a. Mizoram-ah thawktu tlemte in thahnemngai taka an thawhna a zarah AYUSH pawimawhna leh tangkaina kan hmu chho zel a, kum 2019 ah Directorate hrang neiin, tiang chuan hma kan sawn hret hret zel a, amaherawhchu thawktu indaihlohna erawh a nasa a, Sorkar laipui aiawh a Mela lo chhim te pawn hriatpui se, indaihlohna hi Ministry ah ziaka thehluh a nih angin, beng lo var sak turin a ngen nghal a. Minister chuan Mizoram-ah ramhmul damdawi tam tak awm te hi thiamna sang nei ten eizawnnan hmangin, ramhmul damdawi atanga thil siam chhuah neih belh zel dan te ngaihtuahin hma la se a duh thu a tarlang a. Thingtlang leh hmun kilkhawr zawkah doctor leh medical staff indaihlohna avang leh damdawi man a sang tial tial avangin mi harsa zawkten damlohna thilah inenkawlnaah harsatna nasa tak an tawk thin a, heng harsatna te hi engemaw chen chu AYUSH leh ramhmul damdawi hmang a sutkian a ni mek a ni a ti a. Chutiang khawpa tangkai AYUSH science kaltlangin kan rama ramhmul damdawi hman thin te chu zirchiang a, uar leh zuala hman tangkai leh humhalh chu a pawimawh hle a ni tiin a sawi.

Khual zahawm Dr. ZR Thiamsanga chuan AROGYA MELA 2022 in a tum ber chu hriselna kawnga hma kan sawn hi a ni a ti a. Ayushman Bharat nen pawh kalkawp rem tak niin, Mizoram-ah hlawhtling taka AROGYA MELA hawn a ni thei chu lawmawm a tih thu a sawiin an kal zelna turah duhsakna a hlan a ni.

AROGYA MELA 2022 hawnna hun hi Pi Esther Lalruatkimi, Principal Secretary chuan a kaihruai a, Dr. Mara Thansiami Deputy Director (Ayush) hnen atangin AYUSH Mission hmalakna  ngaihthlak a ni a, Dr. Lalkhawngaihi Renthlei chuan lawmthu sawiin he hun hi a khar a ni.

AROGYA Mela 2022-ah hian stall hrang hrang inpho chhuak firm 20 vel an awm a. Mela chhung hian Free Clinic, Seminar, Farmers' Meet, Medical Plant Display, Live Yoga Demonstration te buatsaih a ni dawn a ni.

Tun dinhmunah hian Ayush Doctor te hi District Hospital 11 ah, Community Health Centre 7, Sub-Divisional Hospital 1, Primary Health Centre 8, Integrated Ayush Hospital, Thenzawl; State Referral Hospital, Aizawl OPD ah te rawn theihin an awm a, damlo hnenah damdawi hi a thlawna pek thin an ni a. Tun hnaiah Ayush Health & Wellness Centre 38 chu National Ayush Mission, Mizoram hnuaiah awmin, heng zingah Centre 24 te chu hman mek a ni. Khum 50 awm tur, Integrated Ayush Hospital, Aizawl atan hmalak mek a ni a, khum 10 awmna tur Ayush Hospital, Saitual pawh proposal pawm fel a ni tawh a ni. Heng bakah hian hmasawnna chhawpchhuah tam tak awmin, chung zingah chuan Medicinal Plant Nursery siamna tur Lengpui leh N.Vanlaiphai chu KVK te nen tangkawpa din tura hmalak mek a ni bawk a ni.