No.7962/2020-2021

Aizawl the 30th March, 2021 : District paruk - Siaha, Lawngtlai, Serchhip, Hnahthial, Khawzawl leh Saitual District-ah Anti-retroviral therapy (ART) centre thar hawnna programme chu vawiin khan Health & Family Welfare Minister Dr R.Lalthangliana hovin Assemble Annex Conference Hall, Aizawlah neih a ni.

Health Minister Dr R.Lalthangliana chuan District parukah a ruala ART Centre hawn a ni chu HIV dona kawngah Mizoram tana thil pawimawh leh chhinchhiah tlak tak a ni, a ti. Minister chuan sawrkar, kohhran, khawtlang leh chhungtin te tanrualna avangin ram changkang tam takte tlawmtu hripui COVID-19 lakah ram dangte nena khaikhinin Mizoram dinhmun a tha hle a; hetiang bawk hian HIV/AIDS dona kawngah mitin te tangrual turin a sawm a. Thawhhona tha kan neih chuan HIV pung chho mek pawh nasa taka a tlakhniam a beisei thu a sawi a ni.

Dr R.Lalthangliana chuan hriselna kawngah hriatzauna (awareness) pawimawhzia a sawi a. Hriat tur an hriat loh avanga nun tawi ta tam tak an awm thei tiin HIV dona kawngah pawh mipui mimir, thingtlang khaw kilkhawr ber thlenga cheng te pawhin tih tur leh zawm tur an hriat a, mahni inenkawl dan tha zawk an hriat theih nan awareness lamah tan lak chhunzawm zel pawimawh a tih thu he programme-ah hian a sawi a ni.

ART Centre hi HIV positive te enkawlna leh damdawi an lakna hmun a nih piah lamah an rilru hahna leh harsatna an inbunruahna hmun a ni a. ART damdawi hian HIV hrik taksaa lo pung zel tur a veng a, natna dangin a tlakbuak tur a veng tel bawk. He natna hrik paiten tha taka damdawi an lak chuan nunphung pangngai takin an nung thei a, hna pawh tha takin an thawk thei a ni.

ART Centre hawnna inkhawmah hian Health Special Secretary Pu R.Lalramnghaka chuan ART Centre pawimawhna leh a chanchin tlangpui a sawi a. Kum 2005-ah khan National AIDS Control Organisation (NACO) remtihnain Mizorama a hmasa ber turin ART Centre pakhat Civil Hospital Aizawlah hawn a nih thu leh Lunglei, Champhai, Kolasib, Mamit leh Kulikawn Hospital-ah kan neih mek thu a sawi a ni.

He programme-ah hian MSACS Project Director Dr.Lalthlengliani’n technical report a pe a. Nl.K.Lalngaihzuali, Kulikawn ART Centre a thawk chuan testimony a sawi a. National Health Mission (NHM) Mission Director Dr.Eric Zomawia’n lawmthu sawiin hun hnung a khar a ni.