No.2421/2020-2020

Mamit 25th June, 2020 : Vawiin khan W.Phaileng PHC-ah Dr. R.Lalthangliana, Health Minister hovin CMO Mamit bakah W.Phaileng PHC huamchhunga Medical Officers-te nen Meeting neih a ni.

Dr.R.Lalthangliana chuan Mamit chu Aspirational District, a bik taka India sorkarin tihhmasawn a tum leh thlan bik, District thlan chhuah 117 zinga mi a ni a. Central Sawrkar leh Mizoram Sawrkar pawhin District hmasawnna tura theihtawpchhuaha hma a lak reng thu a sawi. Covid - 19 avangin tun dinhmunah chak taka hnathawh theih ni rih lo mahse ram hmasawnna turin theihtawpchhuaha hmalak chhoh zel a ni a. Hun hmasa lama Sawrkar fawng vuantu an nih laia Adhoc Aided School-te chu an result enin upgrade an nih theih dan tur Education Minister pawhin a ngaihpawimawh thu a sawi bawk. W. Phaileng bial chu Tripura lamte nena inkalpawhna kawng pawimawh tak a nih avangin kawngpui tha an neih thuai chu Mizoram Sawrkarin a ngaihpawimawh avangin hmalak thuai tum a ni a ti.

Health Minister chuan tukin zinga Covid - 19 test result chhuak 1157- te a negative vek chu chanchin lawmawm tak a ni a ti a. Result lawmawm tak kan hriat rualin inthlahdah thei erawh kan ni lo a. Hripui laka kan himna tura mi inpe, Village Level Task Force, Police leh helam kawnga tha thawhtu zawng zawngte chungah lawmthu a sawi a. Mamit District chu Aspirational District anih anga a hnufualna chawikang turin Public Health Centre tinah Ambulance pek vek chu hmalakna tur langsar zinga mi niin, Health Worker 82 zet te Supervisor-ah kaisantir an ni tawh a. Tun huna Health Worker indaih lohna pawh a theih ang anga hmalak chhoh zel tum a ni a ti. Mizoram Sawrkar chuan mipuite hriselna chu a ngaipawimawh hle a, Covid - 19 hrileng chuan rinphak bakin harsatna leh buaina min thlen a. Staff Nurse 200 lak tum pawh hrileng avanga hmalakna a thuanawp tak thu a sawi. Tunah hun harsa takah awm mah ila Mizoram Sawrkar chuan Mamit District chu a en bik dawn a, kawng hrang hranga hmasawnna hna kal turah pawh duhsak an nih dawn thu a sawi a ni.

Pu Lalrintluanga Sailo, Bialtu MLA pawhin hun harsa tak kara a bialchhung hriselna kawnga an dinhmun hrechiang tura tlawhtu, Health Minister chu fakin lawmthu a sawi a. Khawvel pumin kan buaipui Covid-19 avanga mi tam takin nunna an chan laiin, kan ramah nunna chan kan la awm lo chu lawmawm a tih thusawiin Covid - 19 do nan leh a vei mekte enkawlna kawngah Mizoram Sawrkar hmalakna chu rintlak leh fak phu a tih thu a sawi. Bialtu MLA hian a bialchhung chu hriselna kawnga an hnufumnate, chhawmdawl leh khaichhuah an ngaihna zawng zawngah Health Minister chak tak hmalakna hnuaiah hma an sawn zel a beisei thu a sawi a. Hmalakna hrang hrang leh hri dona kawngah inpuhmawh mai lova lungrual taka kal tlang turin bial mipuite a sawm a ni.

Vawiin W. Phaileng PHC-a Meeting hi Pu F.Lallianhlira, Principal Director chuan a kaihruai a, W.Phaileng, Phuldungsei leh Marpara Doctor-te chuan Staffs indaihlohna, Ambulance an mamawh thu, Generator an mamawh thu leh Staffs quarters leh building sak thar ngai leh repair ngaite bakah damlo dinhmun leh an hnathawh dan report kimchang pein Minister hnenah hian an mamawh hrang hrangte chu ziakin an thehlut nghal a ni.

Dr R. Lalthangliana, Health Minister hi Pu Lalrintluanga Sailo 2- Dampa MLA, Dy. Govt. Chief Whip, Er. H.Lalzirliana, 3- Mamit MLA, Dr. F. Lallianhlira, Principal Director, Dr. PC. Lalramliana, Joint Director, DHME, Dr. Lalthanpuii, State Nodal Officer, MCH, NHM, Pu R.Lalmuankima, Consultant (UNICEF) NHM, Pu Laltluanga Inspector of Statistic, DHS te'n an tawiawm a ni.