No.4155/2020-2021
Aizawl, the 16th August 2020 : Vawiin chawhnu dar 2:00 khan Health & Family Welfare Minister Dr. R. Lalthangliana kaihhruaina hnuaiah meeting pawimawh tak SAD Conference Hall-ah neih a ni a, zanin (16/08/2020) atangin 21/08/2020 zing dar 4:30 thleng Aizawl Municipal Corporation (AMC) huamchhungah inkharkhipna "Total Lockdown" kalpui rel a ni. Meeting ah hian Home Minister Pu Lalchamliana, Supply Minister Pu K. Lalrinliana, I & PR Minister Pu Lalruatkima, Medical Operational Team Chairman Dr. ZR Thiamsanga, MLA bakah Chief Secretary Pu Lalnunmawia Chuaungo, Home Secretary leh Health & Family Welfare Secretary te an tel bawk a ni.
Total Lockdown inkharkhip neih leh neih loh chungchangah zau taka inrawnkhawmna leh sawihona neih a nih hnuin meeting chuan Chief Minister ngaihdan leh remtihna an la a, COVID-19 hripui darh zel venna kawnga chak zawka hmalak a nih theih nan August ni 16 (zanin) atangin August ni 21 zing dar 4:30 thleng Aizawl Municipal Corporation huamchhungah inkharkhipna (Total Lockdown) kalpui an rel a. Hemi hun chhung hian contact tracing, a bik takin primary leh secondary contact te zau taka chhui a ni dawn a. A hmatawnga thawktu frontline worker-te pawh zau taka test an ni ang a. Anni bakah mipui mimir atangin swab sample la in Random Sampling Test a ni ang. Total Lockdown hian COVID-19 dona atana thawktute; thuthar thehdarhtu Press mi leh sa te; tui, kawlphetha leh inbiakpawhna lama thawktute leh duty te; bawnghnute leh chanchinbu semtute; nitin mamawh Essential Commodities phur lirthei te a huam dawn lo a ni. Lockdown chhunga inkaihhruaina kimchang "Standard Operating Procedure (SOP) chu zanin la la hian tihchhuah turin hma lak mek a ni.
Meeting ah hian Police leh Health & Family Welfare Department-aiawh ten kimchangin takin contact tracing an kalpui dan tarlangin, tunhnaia positive case thenkhat te kai dan chu engtin tak nge an kai tih chiang taka finfiah a har thu te an sawi a. Contact tracing chungchanga LLTF/VLTF ten anmahni veng chhungah theuh rang taka a tul anga chet an lak theih nan contact tracing chungchanga chetlak a nih dan te a hma thei ang berah inhrilhhriat thin nise an ti.
Meeting ah hian paramilitary force zinga COVID-19 vei leh kai an tam thu sawilan niin an zawm tur inkaihhruaina sawrkarin a siamte chu khauh taka kalpui chhunzawm zel a tul an ti a. Paramilitary force zinga COVID-19 veite chu civil mite nen hmunkhata dah an ni tawh ngailo tih pawh sawilan a ni.
Meeting ah hian COVID-19 dona kawnga a hmatawnga thawktu frontline workers - a bik takin swab sample latu leh thawktu dangte te chuan hri kai theihna chance an neih san bik avangin anmahni inah haw mai lovin hmun khata an riahna tur Facility atan Tourist Lodge Chatlang a building thar an ruahman a. COVID-19 volunteer te pawh lawmman "honorarium" siamsak tha an ti a. COVID-19 Ordinance bawhchhe si lovin positive te address leh chenna bawr chu LlTF te rang taka hriattir thin nise an ti a, hei hian fimkhur leh awmze nei zawka LLTF ten ruahmanna an siamna kawnga a pui thei dawn niin an hria a ni.
Meeting ah hian state pawn atanga bungraw rawn phurluttu lirthei khalhtu leh handymen COVID-19 vei tih la finfiah loh, rinhlelh mek ni si mi 37 Thingdawl-a khunghran mekte chu a theih ang ang anmahni state lamah thawn hawn nise tiin an rel a. Hnamdang bungraw phur lirthei khalhtuten SOP tha taka an zawm nan, SOP hi Hindi leh Bengali a lehlin nise tih a ni bawk.
Ministry of Health & Family Welfare-in December thlaa Mizorama COVID-19 vei mi 5000 bawr awm tura an chhut (projection) chungchang pawh sawilan niin hemi thilah hian Health & Family Welfare Department in ruahmanna an siam Contingency Plan leh hemi atana thil tul te chu Health & Family Welfare Secretary in a sawifiah a ni. New Zealand in an kalpui mek COVID-19 dona kawnga hma lakna Risk Assessment chikhat COVID-19 Alert Framework Level chu Mizoram mila duang turin Planning & Programme Implementation Secretary hnenah mawhphurna pek a ni.
Meeting chuan mipui ten hmun tam takah mask vuah leh social distancing an ngai pawimawh lo chu pawi an tih thu an sawi a, khauh zawka hemi chungchang hi kalpui "enforce" turin hma lak nise tih an rel a. COVID-19 a in taidarh loh nan heng thil awlsam tak - hmai tuam, kut sil, midang nen inhlata awm (social distancing) leh sanitiser hman te hi engtik lai pawha ngaipawimawh turin mipuite an chah a ni.
MGDA, IMA leh Non-Government Hospital Association te pawhin an ngaihdan leh an duhdan te zau takin an sawi bawk a ni.
Meeting ah hian Department hrang hrang Secretary leh Director te, Police hotulute, ZMC hotute, IMA, MGDA leh Non-Government Hospital Association hruaitute an tel a ni.
Attachment
- Loading attachment...
