No.6086/2020-2021

Vawiin chawhnu khan Chief Secretary's Conference Hall, MINECO-ah COVID-19 hripui leng mek kara Mizoram dinhmun thlirhona thutkhawm neih a ni a. Health & Family Welfare Minister Dr. R. Lalthangliana'n he thlirhona hi kaihruaiin, Medical Operational Team on COVID-19 Chairman Dr. ZR Thiamsanga, MLA, Chief Secretary Pu Lalnunmawia Chuaungo, Health Department hotute leh Indian Medical Association (IMA) aiawhte bakah Health department leh Police Contract Tracing Team aiawhte an tel a ni.

Vawiin thutkhawmnaah hian mipui ten awlsam zawka sample an test theih nan Aizawl khawpui hmun laili deuhah sample test theihna hmun pan awlsam tur "kiosks" ruahman tha tih a ni a. kiosk siam ngai tur zat leh a hmunhma turte a rang lama tihfel tum a ni. COVID-19 hrileng karah chhan hrang hrang vangin COVID-19 vei ni silo natna dang vanga damlo, inentir ngai ten harsatna an tawh theih thu sawiho niin hemi kawnga harsatna awm theite an rang lama chinfel a nih theih nan ruahmanna siam thuai tum a ni bawk. Indian Council of Medical Research (ICMR)-in COVID-19 symptoms neite a thlawna an in test theih dan tur ruahmanna a siam thu sawi niin Mizoramah pawh ICMR inkaihhruaina ang hi kalpui a nih theih nan ruahmanna felfai tak siam nghal tum a ni.

Aizawl khawpuia Private Hospital 4 in RAgT hmanga sample test ve theih an dil thu tarlan niin inspection team in vawikhat an endik tawh thu leh, hmalak belh tulna te inhrilh a nih hnuah karkhat hnuah endik leh an nih tur thu tarlan a ni.

Contact Tracing Team hmalakna ngaihthlak a nih hnuah COVID-19 hrileng kai lo tura mitin kan fimkhur lehzual a ngaih thu sawi niin mipuite pawh nasa lehzuala zirtirna pek a tul tih a ni a. COVID-19 dona kawnga Mizoram sawrkar hmalakna thuk lehzuala zirchiang tura mithiam rawih tha tih a ni bawk.

Health Minister chuan COVID-19 dona kawnga tha thlah lova theihtawp chhuahtu zawng zawngte chungah lawmthu sawiin, Zoram kan himna tura theihtawp chhuah reng turin a chah a, zankhat thilthuah kan pung leh thut thei a ni tih hria a fimkhur zual sauh turin mitin a chah a, tunhnaia Presbytery khawmpui neihna zawng zawng an hriat chinah social distancing leh fimkhurna tur hrang hrang an zawm tha hle chu lawmawm a tih thu leh entawntlak a tih thu a sawi bawk a ni.

Health Minister hian Mamit District Hospital sakna tur Rs. 11.85 crores vawiinah hmuh a nih thu a sawi bawk.

Vawiin thutkhawmnaah hian Mizoramah vawiin chhun thlenga COVID-19 dionhmun hetiang hian tarlan a ni:

Positive hmuhchhuah zawng zawng zat : 2212
COVID-19 vei tawh lo, enkawlna hmun atanga chhuahtir zat : 2093 (94.62%)
COVID-19 la vei mek zat : 119 (5.38%)
COVID-19 la vei mek zinga 44.54% hi military/paramilitary forces an ni

COVID-19 positive hmuhchhuah dan:
RT-PCR (ZMC) : 1544
TrueNAT PCR : 322
Rapid Antigen Test : 346
Total : 2212

Sample Test tawh zat:
RT-PCR (ZMC) : 56,273
TrueNAT PCR : 5,122
Rapid Antigen Test : 29,295
TOTAL : 90,960

COVID-19 hri kai hmuhchhuah 2212 zinga 1557 (70.39) hi Mizoram pawn atanga rawn lut (Travel history nei) te an ni a. Tualchhunga inkaichhawng (local transmission) hmuhchhuah zat hi 655 (29.61%) a ni.