No.5202/2020-2021

Vawiin chawhnu khan SAD Conference Hall, MINECO-ah COVID-19 dona kawnga rawtna lut thar chi hrang hrang thlirho a ni. He thlirhona hun hi Health & Family Welfare Minister Dr. R.Lalthangliana'n a kaihruai a, MedicalOperationa Team on COVID-19 Leader Dr. ZR Thiamsanga, MLA, Jt. NGO Coordination Committee, Mizoram Kohhran Hruaitu Committee (MKHC), Indian Medical Association leh Non-Governmental Hospital Association of Mizoram (NGHAM) aiawhte bakah sawrkar official pawimawhte an tel a ni.

COVID-19 veite enkawlna hmun (CCC/DCHC/DCH) atanga COVID-19 vei enkawlte chhuahtir (discharge) dan tur "Discharge Protocol for COVID-19 Patients at CCC and above in Mizoram",  Community COVID Care Centre kaihhruaina, Contact Tracing atanga COVID-19 sample test leh Quarantine kaihhruaina chungchanga rawtna awm te thlirho a ni.

COVID-19 veite enkawlna hmun (CCC/DCHC/DCH) atanga COVID-19 vei enkawlte chhuahtir (discharge) dan tur "Discharge Protocol for COVID-19 Patients at CCC and above in Mizoram" hi a zirchiang tura din mithiam bik awmkhawmna Committee ten rawtna chi hrang hrang an thehluh chu thlirho a ni a, COVID-19 hri kai natna langchhuak lote (asymptomatic) chhuahtir dan tur,  COVID-19 hri kai natna langchhuakte (symptomatic) chhuahtir dan tur leh COVID-19 hri kai damlo natna benvawn nei (severe, critical and immuno-compromised cases) te chhuahtir dan tur ruahmannate a ni.

Kohhran leh Khawtlang (YMA etc.) hmunhmate Community COVID Care Centre (CCC) atana hmang tura tih ngai leh zawm tur ruahmanna chi hrang hrang bakah heng CCCC a inenkawl dan tur leh kalpui dan tur rawtna chi hrang hrang thlirho a ni a. Contact Tracing atanga COVID-19 sample test chungchang leh quarantine chhunzawm an nih dan tura rawtna thar awmte thlirho a ni bawk a, heng sample test turte hi Primary High Risk contact (COVID-19 hri kaite nen inhnimhnai, kai vena chance sangte), Primary Low Risk contact (COVID-19 hri kaite nen inhnimhnai, kai vena chance sang lo), leh Secondary contact (direct taka COVID-19 hri kaite nena inhnimhnai lo) thliar hran dan tur leh sample lak ngai tur chin rawtnate thlirho a ni.

Vawiin thukhawm chuan heng rawtna chi hrang hrangte hi uluk takin an thlirho a, siamrem ngai lai, belh leh paih ngaite bakah ennawn that leh ngaite an thliar hrang a, heng hi mi zawng zawng tana pawimawh a nih avangin fimkhur tak a ngaihtuahna seng a, a rang thei ang bera tipuitling turin an rel a ni.

Health Minister Dr. R. Lalthangliana chuan COVID-19 hrileng chungchang hi khawvelin a hriatthiam dan a inthlak reng a, mithiamten uluk takin research neiin an zirchiang reng a, ngaihdan leh pawm dan pawh a danglam zel thin avangin kan hriatthiam dan ang zelin mipuite tana him thei tur ang berin inkaihhruaina leh kalphung pawh her em zel a ngai thin tih a sawi a. Private Hospital ten TrueNAT laboratory an neih ve theih dan tur leh Rapid Antigen Test an kalpui dan tur pawh sawrkarin chak taka bawhzui zel a ni, a ti a. Dan tlawhchhana tih a ngaih vangin sawrkar kalphunga zawm tur leh tih turte a awm a, engkim peihfel tawh niin Council of Ministers pawhin a pawm tawh a, sawrkar gazette-ah tihchhuah a nih veleh hman tan nghal a ni ang, a ti.