1249/2022-2023
Aizawl, 14th July, 2022 : Vawiin khan SAD Conference Hall, MINECO ah Mizoram a COVID-19 hripui dinhmun thlirho a ni a. He hun hi Health & Family Welfare Minister Dr. R. Lalthangliana'n kaihruaiin, Health & Family Welfare Board Vice-Chairman Dr ZR Thiamsanga, MLA, H&FW Principal Secretary Pi Esther Lalruatkimi, Health & Family Welfare, School Education, Higher & Technical Education, DIPR leh Finance Department hotute, Aizawl Bawrhsap leh ZMC hotute bakah Indian Medical Association, MKHC, CYMA, VC Asociation, NGHAM leh ACLCA aiawhte an tel a ni.

Vawiin thukhawm hian kumin March ni 21 a in kaihhruaina (SOP) tihchhuah tuna kan hman mek chungchanga State Level Expert Team On Covid-19 Management (SLETOCOM) rawtna siamte an thlirho a, mipuite tana phurrit lo leh eizawnna nghawng nasa lo thei ang bera inkaihhruaina siam a tul thu an sawi a ni. Hri kai inringhlelte tan a rang thei ang bera sample test a pawimawh thu sawi lan niin, natna langchhuak (symptom nei) te pawh an natna a lanchhuah veleh a rang thei ang bera in test thin turin an ngen a, mahni a sample in test (self test) te pawh IDSP hnenah emaw, anmahni bialtu health department hotute hnenah in report thin turin an ngen a ni.

Hri kai tharte chu an natna a serious a nih loh chuan home isolation (mahni in lama inenkawl) uar a that thu sawi a ni a, Omicron variant a nih tlangpui tawh avangin hri kai chhungte quarantine hranpa a tul lova, fimkhur taka mask leh kutkawr nen hri kaite enkawl a him tih sawi a nih bakah, CAB tha taka vawn a pawimawh a, contact tracing leh exit test a tul lo tih sawilan a ni bawk. Hri kai enkawl mekte chu uluk taka vil a an natna a zual deuh erawh chuan a rang thei ang bera damdawi in panpui emaw, in report emaw a tul thu sawi a ni.

Sawrkar leh private damdawi in hrang hrangahte sample test theih a nih bakah awlsam taka pan theih turin kiosk leh mega kiosk siam thar leh a tul thu tarlan a ni a, sample test kit tun dinhmunah a thlaphanawm loh thu sawi a ni a, COVID-19 dona hmanraw chi hrang hrang pawh stock a awm that thu tarlan a ni.

COVID-19 vaccine lak a pawimawh thu mipuiten hre thar leh se an duh thu tarlan a ni bawk a, a bik takin precautionary dose lak hun tawhte leh 2nd dose lak hun tawhten lak ngei ngei a tul thu tarlan niin, precautionary dose private hospital-ah chauh lak theih tia sawrkar laipui thupek chu tihdanglam a nih thu leh, India ramin zalenna a hmuh kum 75-na denchhenin naktuk July ni 15, 2022 atanga chhiara ni 75 chhung chu precautionary dose hi a thlawnin sawrkar vaccination centre-ah pek chhuah a nih tur thu tarlan a ni a, precautionary dose la thei chin 2nd dose lak hnu thla 9 tih pawh chu thla 6 ah a lak theih tawh thu tarlan a ni bawk.

Zirna In hrang hrangah COVID-19 vaccination drive kalpui mek chu uar taka kalpui chhunzawm zel tha tih a ni a, tun dinhmunah chuan zirna in khar a tul rih loah an ngai a ni.

Zoram Medical College ah COVID-19 hri kaite tan ICU khum 9 leh Ward pangngaia khum 114 ruahman a nih thu tarlan a ni a, tun dinhmunah chuan damlo 38 enkawl lai an awm a, ICU a enkawl ngai an awm rih lo a ni. COVID-19 hri kaite enkawlna tur damdawi Remdesivir leh Tocilizumab an ngah tawk rih a, ZMC-a Genomic Sequencing Laboratory-a hri kaite sample endikah Omicron (B.A.2) hlir an la hmu rih tih tarlan a ni bawk.

House to House (vaccination) (Har Ghar Dastak Abhiyan 2.0) hnuaiah khaw 302 tlawh tawh an ni a, heng zinga khaw 110 hi tlawh nawn leh tawh an ni. Vaccine la thei 2nd dose pek vek tawhna (100%) khaw 288 an awm a, khaw 27 hi 1st dose la kim vek tawh, 2nd dose pek leh tur an awm bawk. Heng khua zawng zawnga in an tlawh zat hi 21,060 a ni. Vaccine hi district tinah stock a awm tha tawk bawk a ni.