No.1064/2021-2022  

Aizawl, 21^st June, 2021 : Vawiin khan Health Minister hovin SAD Conference Hall, MINECO-ah Mizorama COVID-19 hri kaite enkawl dan chungchang sawiho a ni a. He hunah hian Medical Operational Team Chairman Dr ZR Thiamsanga, MLA, Chief  Secretary Pu Lalnunmawia Chuaungo, Health Secretary Pu R. Lalramnghaka, Health department hotu pawimawhte bakah ZMC a damlo enkawltu daktawrte, Indian Medical Association,  Non-Government Hospital Association of Mizoram, Association of Physicians leh Aizawl Civil Hospital aiawhte an tel a ni.

Health Minister Dr. R. Lalthangliana chuan India rama COVID-19 hrik thar Delta variant chu kar hmasa khan Mizoramah ngei a rawn lut ve ta tih finfiah a nih thu National Centre for Disease Control, New Delhi atangin hriattirna kan dawng a, hei hian Delta variant hi kan kawl ve ni a hun engemawchen kan lo rinhlelh rilruk tawh chu a rawn nemnghet ta a, tunhnaiah  hri kai kan neihten nunna an chan zing ta em mai bawk nen, damlo kan enkawl dante uluk zawka thlirho a, a tul ang anga hmalak chhunzawm dan turte ngaihtuah a tul a ni, a ti a. ZMC-a damlo enkawltute inpekna a chhuanawm tih sawiin hetih rual hian ZMC daktawr ni lo, daktawr dangte, retired tawhte thlenga an ngaihtuahna, tha leh zung senga theihtawp chhuahtute chungah lawmthu a sawi bawk a ni.

Minister chuan COVID-19 damdawi, damloten an dampui tak takna tur bik liau liau hmuhchhuah la ni lo mahse, damlo enkawlna kawnga tangkai thei ni a kan hriat damdawi chi hrang hrangte hi engtin nge kan hmuh theih ang a, kan lakluh zung zung theih ang, tih hi kan ngaihtuah a ngai a ni,  a ti bawk.

ZMC daktawrte chuan damlo an enkawl dan leh an buaipui dante an sawi a, hri inkaichhawnin hniam lam a pan theih loh rual hian nunna a tam thei ang ber chhanhim hi a pawimawh ber a ni, an ti a. Damlote an enkawlna kawnga damdawi an hman chi hrang hrangte sawiho niin, damlote tanpui theitu damdawi hriatchian tawhte chu mamawh ang zat a rang thei ang bera lei tha tih niin, a lei theih dan tur leh a leina turte ngaihtuah nghal tura hmalak  tum a ni. Damlote an enkawlna (treatment protocol) chungchangah sawrkar laipuiin inkaihhruaina a siam tharlam ber dungzuia kalpui a nih thu tarlan a ni bawk.

Home Isolation, CCC leh CCCC atanga damlo na zual deuh ZMC a an phurh thlen te hi  an dinhmun a lo tha lo hman viau zel tih sawi lan a ni a, a bik takin Home Isolation/Home Quarantine, CCC leh CCCC a awmte chu mahni uluk taka a khat tawka inchik (self-monitor) reng tura chahin,  oxygen level (SPO2) 94% hnuai lam a nih chuan rang taka daktawrte hnena in report nghal thin turin an ngen a, mithiamten COVID-19 third wave lo thleng turah naupangte, a bikin kum 10 – 18 inkarin an tuar na lehzual dawn ni a an sawi avangin anni ho hi tun atanga ngaihtuah lehzual an tul tih tarlan a ni bawk.