No.5530/2020-2021

Aizawl, September ni 28, 2020 : Vawiin khan SAD Conference Hall, MINECO-ah Health & Family Welfare Minister Dr. R.Lalthangliana hovin COVID-19 hri kaite hnawmhnawk (medical waste) senghawi dan tur leh Mizoram pawn atanga lo haw Home Quarantine-te awmdan tur sawiho a ni a. Medical Operational Team on COVID-19 Leader Dr. ZR Thiamsanga, MLA bakah AMC Mayor, Deputy Mayor leh Executive Councillor-te an tel a, Joint NGO Coordination Committee, Mizoram Kohhran Hruaitu Committee (MKHC), Indian Medical Association (IMA) leh Non-Governmental Hospital Association of Mizoram (NGHAM) aiawhte bakah Health department leh Finance department hotute an tel a ni.

COVID-19 hri kaite enkawlna hmun CCC leh Home Isolation atanga bawlhhlawh leh hnawmhnawk senghawi chungchangah Aizawl Municipal Corporation hotute chuan tun dinhmunah Quarantine Centre hrang hranga an hnawmhnawkte an senghawi mek tih an sawi a, CCC leh Home Isolation a awm mekte hnawmhnawk senghawi chungchangah thawktu indaihlohna awm tho mahse, heng hnawmhnawkte a him tawk leh tawk loh thu ah fimkhur thiam a har bawk si a, heng hnawmhnawkte hi sawrkar thuneitute lamin a senghawi dan tur an ruahman theih chuan a phum bo kawngah ruahmanna an siam theih thu lo lo buaipui vek an inhuam thu an sawi a, rawtna leh ngaihdan hrang hrang sawiho niin, Medical waste te hi mithiamte chuan sodium hypochloride hmanga uluk taka chiah a nih a fun that a nih chuan bawlhhlawh paihtute tan pawh a him tawk a ni tih an sawi a, Health Minister chuan uluk deuha ngaihtuahna sen ngai a nih avangin a rang thei ang bera hma lo lak chhunzawm a nih tur thu a sawi a ni.

Health Minister chuan Aizawl Municipal Corporation in COVID-19 dona kawnga an hmalakna fakawm a tih thu sawiin, theihtawp an chhuah a,m Mipuite him nan AMC sum kawng hrang hrangah an hmanga, chhuanchhama mipuite an awmlohna tur leh kan himna tura AMC Councillorte kaltlanga Rs. nuai 95 lai an sengso tawh chu lawmawm a tih thu a sawi a ni.

Mizoram pawn atanga Mizoram lo lut, mPASS kaltlanga Home Quarantine phalsakte zawm tur leh an sample test dan tur bakah home quarantine chhunga an inenkawl dan tur ruahmanna duan lawk chu uluk takin vawiin thukhawm hian an thlirho bawk a, Lengpui Airport leh screening point hrang hrang atanga lo lut, home quarantine phalsakte leh quarantine centre a awm turte zawm tur chi hrang hrang ruahmanna hi chichiar taka sawiho niin rawtna awm belhte leh siamrem ngaite sawiho a nih hnu ah siam that a zawm nghal theih tura peihfel tum a ni.