No.1540/2021-2022

Aizawl, 24^th July, 2021 :  Vawiin khan Health Minister Dr. R. Lalthangliana hovin SAD Conference Hall, MINECO-ah Mizorama COVID-19 kaihhnawih thil pawimawh tak tak sawiho sawiho a ni a. He hunah MSCPCR Chairperson Dr. C. Lalsangzuala, Health Secretary Pu R. Lalramnghaka, Social Welfare Secretary Pi Sangchin Chinzah, Health department hotu pawimawhte bakah ZMC a damlo enkawltu daktawrte, Indian Medical Association,  Non-Government Hospital Association of Mizoram, Association of Physicians leh Aizawl Civil Hospital aiawhte an tel a ni.

Vawiin meetingah hian COVID-19 vanga nu leh pa emaw, nu/pa chan naupang mi 63 an awm tawh thu tarlan a ni a, an zinga 59 hi nu leh pa kara cheng, nu emaw, pa emaw thi niin, midang zawng hi nu emaw, pa emaw nen chauha awm (single parent-in a enkawl) an ni. Tunhnaiah naupang quarantine lai mahni nunna la an awm chu a pawi thu sawi niin, COVID-19 kaihhnawiha naupangte himna hi supreme court pawhin a ngai pawimawhin order pawh a tih chhuak tawh a ni tih sawi a ni a. Sawrkar Laipuiin inkaihhruaina a siamah kum 18 la tling lo zawng hi naupang anga ngaih tur an ni tih a ni a. COVID-19 vanga nu emaw, pa emaw, nu leh pa emaw chan naupangte chu PM Cares hnuaia ziahluh zel an ni bawk a, naupangten rilru leh taksa hrisel an neih theih nan theihtawp chhuah a tul thu sawi a ni. COVID-19 third wave lo thleng turin naupangte a nghawng na dawn ni a sawi a nih vangin an rilru leh ngaihtuahna venpuina turin tun atanga ruahmanna felfai tak siam lawk a tul thu tarlan a ni bawk.

COVID-19 hri kai naupangte bakah hri kai ve kher lo, mahse he hripui kaihhnawiha harsatna tawk ten rilru leh ngaihtuahna hrisel bakah taksa hrisel an neih theih na tur leh an sahimna atana hma la turin Health Secretary kaihhruaina hnuaiah member 7 awmna committee din a ni a, anni hian a rang thei ang bera hma la in, inkaihhruaina dan an duang ang. He committee hian COVID-19 kaihhnawiha naupang pianphunga rualbanlote enkawl dan tur leh kaihhruai dan tur an ruahman dawn bawk a ni.

Health department hnuaia clinical psychologist ten kumin June ni 17 atang khan naupang home isolation awmte telephone hmanga vilin counselling an pek thin thu tarlan a ni a, Social Welfare department hotute chuan naupangte vil tur leh a tul anga counselling pe turin Social Welfare department hnuaia social workers te chu engtiklai pawhin an inhawng reng tih an sawi a, kawng hrang hrangah a theih ang angin an department chuan hma lak an inhuam tih sawiin, COVID-19 kaihhnawiha naupang an tel a nih chuan rang taka inhriattir zung zung tha an tih thu an sawi bawk.

ZMC daktawrte chuan tunhnaiah ZMC a admit thar leh ICU a enkawl zingah kum naupang lam (thalai ho) an pung tih an sawi a, nitin OT ah COVID-19 positive zai ngai an neih thin tak thu sawiin, raipuar COVID-19 positive admit ngai an tam thu an sawi bawk a ni. Damlote enkawlna atana damdawi an hmante chu tun dinhmunah an ngah tawk tih tarlan niin, ventilator pawh an nei tha tawk a, ventilator thar 10 rawn bun turin phai lam atang company engineer te an rawn kal dawn tih an sawi bawk.

COVID-19 hri kaite enkawl dan tur Ministry of Health & Family Welfare in a duan thar chu thlirho a ni a, hri kai zingah symptom nei lo leh symptom nei nasa lo (moderate/mild symptomatic) te tan damdawi mahni duh ang ang lo inchawh ve ngawt a him loh thu tarlan niin, nachhawkna pangngai (paracetamol) bak ei a tul lo an ti a, COVID-19 damdawi dik tak hmuhchhuah a la nih loh avangin daktawrte hriatpui loha damdawi lo lei mai mai a tha lo tih an sawi a ni.

COVID-19 positive te thinhrik loh tur a ni tih tarlan niin, tu chungah pawh a thleng thei a, positive ni mahse an fimkhur phawt chuan midang tan an hlauhawm loh a, home isolation pawh sawrkar SOP anga kalpui theihna ah chuan kalpui zel a tul zawk a ni tih sawi a ni.

Sample Test runpui (mass testing) chu karleh lockdown puan chhung hian Aizawl khawpui chhungah nasa lehzuala kalpui tum a nih thu tarlan a ni a, private hospitalte pawhin sample collecting team anmahni mi leh sate atang an thawhchhuahpui theih tur thu an sawi a, mass testing neihna hmunah hian serial testing neih chhunzawm zel tur a ni a, hetah hian mass testinga positive te chenpuite leh anmahni hnaihtute chu ni 5 hnuah test nawn leh an ni ang a, chuta positive te chenpuite leh anmahni hnaihtu midangte chu ni 5 hnuah test nawn leh an ni ang a, chutiang chuan a tul danin an tih chhunzawm zel dawn a ni.