No.732/2021-2022

Aizawl, 29^th May, 2021 :Vawiin khan health Minister Dr R. Lalthangliana hovin SAD Conference Hall, MINECO-ah COVID-19 hrikaite hnuchhui (contact tracing) chungchang sawiho a ni a. Medical Operational Team Chairman Dr Z.R. Thiamsanga, MLA, Pu R. Lalramnghaka, Special Secretary, H&FW, Pu LalbiakthangaKhiangte DIG (NR), Aizawl District Bawrhsap Dr.Lalhriatzuali Ralte, Health department officials te bakah Medical Operational Team leh Aizawl City Local Council Association aiawhte an tel a ni.

Vawiin meeting-ah hian Police Contact Tracing Team-in hma an lakdan report a, contact tracing team in harsatna an tawh lianber leh hnuchhui kawngah hmalak tiharsa bertu nia an sawi chu hrikai hmuhchhuah thar zinga tam takin an contact te an sawi hreh thin hi a ni a, midangte hek nia inngai an awm tlat avangin an zep tlat thin hian harsatna a siam nasa hle tih an tarlang a, midangte an lo him zel zawk nan an contact te tha takin sawi thin se an duh thusawiin, hemi chungchangah hian ruahmanna uluk taka siam a tul thu sawi a ni.

Lockdown chhunga hrikaite Hnuchhui atanga an hmuhchhuah pakhat chu chhungkua a inkaichhawng an tam bakah, a ruka chhungkhat laina te intlawh, thian tha te nena in len pawh leh thenawm hnai inlenpawh atanga hrikai an la tam tih hi a ni a. Mipuite chu kan himna tur a ni tih hria a inlenpawh kawngah insum hram hram turin an ngen a ni.

Meetingah hian Mizorama hripui in hna a thawhdan leh mipuiten kan inkaichhawn dante, dam lote dinhmun leh enkawl an nih dan bakah thil pawimawh tam tak sawi a ni a, hei hi a zirbing tura sawrkarin a ruat tharten kimchang taka kan dinhmun an zirchian theihnan tunaia mumal leh awmze nei zawka data buatsaih tha tih a ni a. A tul anga ruahmanna siam nghal tha an ti a ni. Data kimchang taka neih a nih chuan hripuileng do mekna kawngah leh third wave lo thleng leh tur nia mithiamten an sawi lakah mumal leh awmze nei zawka lo inbuatsaih theih beisei a ni.

Integrated Disease Surveillance Programme (IDSP), Health & Family Welfare Department chhinchhiah danin May ni 1 – 28, 2021 chhungin Mizoramah COVID-19 positive 5528 hmuhchhuah(Mipa - 2825, Hmeichhia – 2703) an ni a. District hrang hranga hmuhchhuah zat chu : Aizawl - 3949 (71.44%), Lunglei - 345 (6.24%), Siaha - 112 (2.03%), Champhai - 84 (1.52%), Kolasib – 287 (5.19%), Serchhip – 295 (5.34%), Lawngtlai – 258 (4.67%), Mamit – 80 (1.45%), Saitual – 77 (1.39%), Khawzawl – 40 (0.72%) leh Hnahthial – 1 (0.02%) a ni a. Positive hmuhchhuah zinga mi 2650 in symptom an nei a, symptom nei lo mi 2878 an awm a ni. Mi 3297 (59.64 %) hi tual chhunga hri inkaichhawng (local transmission) an ni a, a tira hrikaina hriat loh mi 1580 (28.58%) awmin, Mizoram pawn atanga lo lut 600 (10.85%) an ni a, Frontline Worker mi 51 (0.92%) an awm bawk a ni.

May ni 1 – 28 in kara positive hmuhchhuah zinga kum bithliah (age group) hrang hrang dinhmun :

Police Contact Tracing report-a a landanin May ni 1 – 17 chhung khan positive hmuhchhuah zingah vaccine full dose la tawh mi 8 leh first dose la tawh mi 4 an awm a, negative certificate neih duh vanga sample test zingah positive 14 awmin, chhungkuaa mi pakhat aia tam a ruala hrikai chhungkaw 669 awmin, chhungte hnena kaichhawng awmna chhungkua 725 an awm a, laina te tlawh vanga hrikai mi 121, thenawm hnaite tlawh vangakai mi 195, thiante intlawh tawn vanga kai mi 81 leh hnathawhna hmuna hrikai mi 122 an awm a ni. Heng bakah hian bazarna atanga hrikai niin hria engemawzat an awm bawk a, lu mehna dawr atanga kai leh thil dang chi hrang hrang atanga kai an awm bawk a ni.