No.5068/2020-2021

Vawiin chawhnu khan SAD Conference Hall, MINECO-ah COVID-19 positive hmuhchhuahho enkawlna hmun Covid Care Centre (CCC) indaihlohna phuhru tura hmalak dan thlirho pahin CCC kaihhnawih thil pawimawh chi hrang hrang sawiho a ni a. Health & Family Welfare Minister Dr. R. Lalthangliana'n kaihruaiin, Medical Operational Team on COVID-19 Leader Dr. ZR Thiamsanga, Chief Secretary Pu Lalnunmawia Chuaungo bakah CCC kaihhnawih department hrang hrang hotuliante an tel a, Mizoram kohhran Hruaitu Committee (MKHC) leh Jt. NGO Co-ordination Committee hotute an tel a ni.

Vawiin thutkhawmah hian Mizoram district hrang hranga CCC dinhmun tarlan a ni a, Aizawl district ah CCC 18 awmin khum 1042 dah theihna a ni a. Civilian 882 awm theihna CCC leh Para-military force 160 awm theihna an ni. Aizawl district, a bik takin Aizawl khawpui leh a chhehvelah CCC mamawh belhna a san avangin sawrkarin kawng hrang hrangin hma a la a, tunhnaiah mi 480 awm theihna tur BSUP building, Durtlang leh mi 80 enkawlna tur Women's Polytechnic Hostel old building, Durtlang chu a hmunah kalin endik a ni a, a tul anga hmalak chhunzawm a ni ang. Kohhran leh YMA ten an hmunhma te CCC atana hman an phal thu dawn a ni mek zel chu vawiin thukhawm chuan lawmawm an tih thu an sawi a, heng hmunhmate CCC atana hman tura a him tawk leh tawk loh endik a ni ang. Mizoram University hotuten an hmunhma thenkhat CCC atana hman an remtih thu pawh dawn niin, naktuk hian Health Minister hovin endik tum a ni.

Tun dinhmunah hian Mizoram pumpuiah CCC atana hman mek leh hman tura pawm 35 awmin, a ruala COVID-19 positive 1722 enkawl theihna tura hisap a ni.

Vawiin thukhawm hian CCC hrang hranga hnawmhnawkte (bio-medical waste leh general waste) senghawia tihral dan tur an ngaihtuah a, Sawrkar laipui atanga inkaihhruaina dan an siam tha tak tak awm mahse kan dinhmun thlirin kan tana tha ber turin ruahmanna siam nise an ti a, heng hnawmhnawkte hi phum bo (deep burial) zel dan tur ruahmanna siam tum a ni.

Private Hospital-a TueNAT khawl bun a sample test tir chungchang leh RAgT hmanga Provate Hospital-a in test chungchang pawh sawrkarin a ngaihtuah mek thu tarlan a ni a, COVID-19 Testing strategy siamthat a tul thu leh testing facility tih changtlun a tul thu tarlan a ni bawk.

Tun Lockdown chhung hian COVID-19 inkaichhawnna khaidiat (transmission chain) chhut chah hman beisei a nih thu tarlan niin hemi atan hian contact tracing team, sample collecting team leh ZMC laboratory a thawktuten chhunzan zawma an thawh thu tarlan a ni a, an chungah lawmthu an sawi a. hetih rual hian positive tharte an chhui chianna ah case tam ber chu mipuite fimkhurna kawnga kan inthlahdul deuh vang nia a lan thu tarlan a ni bawk.

COVID-19 positive asymptomatic-te chungchangah an dinhmun in a tlin a, khawtlang hruaitute pawhin rem an tih a nih chuan in lama inenkawl "Home Isolation" kalpui hi a tha zawk em? tih chungchang sawiho a ni a, uluk taka zirchian a nih hnuah rawtna siam a, ngaihtuah leh atan tih a ni a, hei bakah hian SOP for Children under 18 on COVID-19 siam a nih thu leh sawrkar pawmpuina dil mek a nih thu tarlan a ni a, SOP for Vulnerable People pawh duan mek a nih thu tarlan a ni.