No.887/2021-2022

Aizawl, 9^th June, 2021 : Vawiin khan Health Minister Dr. R. Lalthangliana hovin COVID-19 hri kaite enkawlna hmun Dedicated COVID Hospital (DCH) Zoram Medical College-a bawlhhlawh  tawih theilo (plastic waste) senghawi dan tur ngaihtuahin sawrkar hotu pawimawhte an thukhawm.

Health Minister Dr. R. Lalthangliana chuan ZMC-a COVID-19 hrikaite enkawlna hmunah damlote leh anmahni awmpuitute bakah, thawktute leh volunteers tam tak an awm avangin loh theih lohin bawlhhlawh pawh a pung  chak em em mai a, ZMC-a bawlhhlawh halna khawlpui (incinerator) hmanga hal theih chin hi chu a buaithlak loh a, incinerator hal theih loh a bikin plastic waste te senghawia paihna tur ngaihtuah ran a ngai hle a ni a ti a, mipuite tana him si hmun ngaihtuah a tul avanga meeting koh a nih thu a sawi a ni.

Muallungthu rama ZMC plastic waste sawngbawlna tur hmun siam mek chu reiloteah zawh mai tawh tur ni mahse tuna plastic waste inchhekkhawl tawhsa te a rang thei ang bera senghawi a ngaih vangin AMC Mayor Pu Lalrinenga Sailo kaihhruaina hnuaiah hma la nghal tur Task Force din a ni a. AMC Executive Councillor Pu Laltlanzova Khiangte, SIPMIU Program Director, UD&PA Director, AMC Commissioner, Hmuifang bialtu PWD Executive Engineer leh ZMC aiawh mi 1 memberah ruat an ni.

Vawiin meetingah hian Hualngohmun rama bawhhlawh sawngbawln a tur cheng vaibelchhe 35 man hu project siam mek a nih thu tarlan niin, Aizawl tlak lam leh hmar lamah pawh hetiang hmun tur hi mamawh a nih thu tarlan a ni.

Vawiin meetingah hian Medical operational Team Chairman Dr ZR Thiamsanga, Chief Secretary Pu Lalnunmawia Chuaungo, AMC Mayor Pu Lalrinenga Sailo bakah Health & Family Welfare, Urban Development & Poverty Alleviation, Mizoram Pollution Control Board, PWD, SIPMIU, AMC leh ZMC hotute an tel a ni.