No.4922/2020-2021
Vawiin tlai khan SAD Conference Hall, MINECO-ah Health & Family Welfare Minister Dr. R. Lalthangliana hovin Emergency Meeting neih a ni a, Medical Operational Team on COVID-19 Chairman Dr. Z.R. Thiamsanga, Chief Secretary Pu Lalnunmawia Chuaungo bakah Health & Family Welfare Secretary, Home Secretary, Health & Family Welfare Department hotute bakah Contact Tracing Team hotute an tel a ni.
Health & Family Welfare Minister Dr. R. Lalthangliana chuan emergency meeting koh a nih chhan sawifiahin tukin result chhuakah COVID-19 positive thar 69 an awm a, hei hi Mizorama nikhat thilthu a COVID-19 positive tam ber tum a la ni a, an zingah hian BSF 48 leh Indian Army 6 an tel a, Mizoram mi leh sa 13 telin anni hi positive contact atanga kai an ni a, mipuite pawh kan fimkhur thar leh a tul a, tul lovah chuan pawn chhuah leh thenawm khawveng inlenpawh hi insum hram hram ila, a huhova thiltih ang chi pawh insum rih a tha niin a lang, a ti.
Vawiin emergency meeting ah hian Contact Tracing Team-te report ngaihthlak a ni a, chhunzan zawma chawl lova hna an thawh avangin rang tak takin hma a lak theih thin a ni tiin an hmalak tawhna a fakawm thu sawiin meeting hian lawmthu an hrilh a ni.
Vawiin meeting hian COVID-19 dona kawnga hmalak dan te an thlir hova, uluk lehzuala hmalak dan turte sawiho a ni a. Naktuk September ni 10, 2020 hian Health Minister hovin Microbiologist leh Physician sawm bikte bakah helam kawnga thiamna bik nei Professor rualte chu he natna hrik hnathawh dan chin, inkaichhawn awlsam dan chungchangte thuk zawka sawiho turin an thukhawm dawn a ni.
