No.5402/2020-2021 

Health Minister Dr. R. Lalthangliana hovin vawiin chawhnu khan SAD Conference Hall, MINECO-ah  COVID-19 vei enkawlna hmun atanga inchhuahtir dan tur "Revised Discharge Protocol" ruahmanna thar thlirho a ni a. Mizoram Legislative Assembly-a party tin aiawh MLA te he thlirhona hun ah hian tel ve tura sawm niin Congress Legislature Party Leader Pu Zodintluanga Ralte-in a telpui thei a ni.

Health Minister Dr. R. Lalthangliana chuan Assembly Session hnuhnung berah khan Revised Discharge Protocol kalpui a nih dawn chuan party tin aiawh MLA te nen sawiho a intiam tawh avangin he thlirhona nei tur hian sawmna pek chhuah a ni a, a ti a. Revised Discharge Protocol duang tur hian mithiam bik awmna committee din niin vawi duai lo an thukhawm a, Mizoram kan dinhmun an thlir bakah India ram dinhmun leh khawvel ram hrang hrang dinhmun leh Discharge Protocol an kalpui dante an zirchiang a, an thawhrimna a fakawm hle a ni, a ti.

Congress Legislature Party Leader Pu Zodintluanga Ralte pawhin hun khirh kan tawn mekah sawrkar hmalakna an thlawp tlat thu sawiin, pawn lama mithiam leh ngaihdan nei ni a inhria, duh duh sawi an tam avangin mipuite an ti ralkhel thin a. Sawrkarin a rawih mithiamten uluk taka an ngaihtuah hnu a ruahmanna an siam hi khauh taka a kalpui mai zel hi a tha ber ni a a hriat thu a tul anga siamthat ngai lai te siam that zel mai hi a tha ber rih niin a lang, tih a sawi.

Revised Discharge Protocol duan mekah hian CCC/DCHC/DCH leh Home Isolation a awm COVID-19 hri kai natna lang chhuaklote (Asymptomatic), natna langchhuakte (Symptomatic) leh damlo natna benvawn neite chhuah zalen dan tur ruahmanna hrang hrang thlirho a ni a, zau taka sawiho niin siamrem ngai laite leh rawtna tharte thlirho a ni a. Heng sawiho na eng atang hian ruahmanna mumal hrual mum a ni ang.

Revised Discharge Protocol bakah hian Quarantine inkaihhruaina bakah Mizoram pawn atanga lo haw te in quarantine dan turte ennawn a ruahmanna thar siam a tul thu sawi a ni.

Dr. R. Lalthangliana chuan ram hruaituten COVID-19 dona kawnga an tawiawm that thin avangin lawmthu a sawi a, Governor P.S. Sreedharan Pillai pawhin kan dinhmun  a ngaihven reng bakah a theih ang angin hma min laksak thin a, kan MLA te pawhin rilru zau tak nen ngaihtuahna min senpui thin a, thurawn tha tak tak min pe thin hi a lawmawm takzet a ni, a ti.

Vawiin thlirhona hunah hian Medical Operational Team on COVID-19 Leader Dr. ZR Thiamsanga, Chief Secretary Pu Lalnunmawia Chuango, Jt. NGO Coordination Committee aiawhte leh Indian Medical Association aiawhte bakah sawrkar mi pawimawhte an tel a ni.