No.1458/2021-2022

Aizawl, 19th July, 2021 : Nimin khan SAD Conference Hall, MINECO ah July ni 24, 2021 thlenga AMC huamchhunga total lockdown leh Mizoram chhung hmun danga inkhuahkhirhna kalpui chhunga chetlak dan tur relho a ni a. He hun hi Health & Family Welfare Minister Dr. R. Lalthangliana'n kaihruaiin, I&PR Minister Pu Lalruatkima, MOT Chairman Dr. ZR Thiamsanga, MLA, Pu Vanlalhlana, MLA, Pu C. Lalmuanpuia, MLA, Pu C, Lalsawivunga, MLA, AMC Mayor Pu Lalrinenga Sailo, Chief Secretary Pu Lalnunmawia Chuaungo bakah Health Department hotute, AMC hotute leh Aizawl City Local Council Association aiawhte an tel a ni.

Health Minister Dr. R. Lalthangliana chuan Total Lockdown puan chhung hian Aizawl khawpui leh Mizoram hmun hrang hrangah COVID-19 hri pui inkaichhawnna chhu chat turin theihtawp kan chhuah a ngai a, hei hi lockdown kan kalpui chhan ber pawh a ni, a ti a. Hetih hun chhung hian Aizawl khawpui huamchhunga hri kai tamna leh pun chakna vengahte sample test runpui (mass testing) neih tum a ni a, TNT, Muanna Veng, Aizawla thla kalta lama mass testing kan neih khan awmzia a nei tha hle a, khami tuma kan kalpui ang khan hma kan la dawn a ni, a ti.

I&PR Minister Pu Lalruatkima pawhin COVID Appriopriate Behaviour ngawrh taka uar lehzual inzirtir turin tan lak a nih thu tarlangin, electronic media te nen pawh tan lakho dan tur an relho thu a sawi a, LLTF/VLTF leh Kohhranho thahnemngaihna leh inpekna a fakawm tih sawiin, lockdown chhunga chhuanchham an awm lohna turin Task Force te mai bakah mipui aiawh tura thlan Minister, MLA, Councillor zawng zawngten a tul anga ruahmanna siam zung zung tura beng an chhit tlan reng a pawimawh tih a sawi bawk a ni.

Meetingah hian COVID-19 first wave hun chhung kan tih mai nikum March thla atanga kumin March thla tawp, thla 13 chhungin sample test zat mi 2,53,203 zingah COVID-19 hri kai mi 4476 hmuhchhuah an nih thu leh second wave hunchhung kumin April atanga July ni 17, 2021 thleng khan sample 3,02,696 test zingah COVID-19 hri kai mi 22,677 hmuhchhuah an ni ta der mai. COVID-19 vanga nunna chan hi first wave ah khan mi 11 awmin tun second wave ah July ni 17, 2021 thleng, thla 3 leh a chanve chhungin mi 110 an awm thu tarlan a ni.

Sample test runpui nei tura sawrkar inruahman dan tarlan a ni a. Sample collecting team (sample lak saktute) indaihlohna phuhru turin volunteers sample la tur Laboratory Technician leh report buatsaihtu tur Data Entry Operator (DEO) mi 50 vel Sawrkar leh Aizawl City Local Council Association tangkawpin an lakf el tawh thu leh training pawh State IDSP in an pek tawh thu tarlan a ni a, indaihlohna a la awm chuan a tul angin sawrkar hnathawkte chhawr an nih dawn thu tarlan a ni bawk.

COVID-19 hri kai tamna veng leh pun chakna vengahte mass testing hi rang taka neih a, a thawhkhatna a negative te chu ni 4 hnuah test nawn leh tur a ni a, a tul dan anga zirin serial testing hi vawi engemawzat tih tum a ni.

Sample testna atana hman tur Rapid Antigen Test Kit chu mamawh ang zat a awm thu leh test kit indaih loh hlauhthawnawm a nih loh thu tarlan a ni a, Aizawl pawnah pawh a tul dana zirin district thuneituten ruahmanna an siam tur thu sawi a ni.

Tunhnaia Aizawl veng thenkhata mass testing neih tura ruahmanna siamah a veng chhung hruaitute atangin remti lo an awm thin tih tarlan niin, tun tuma sawrkarin hetianga hma a lak lehna turah hi chuan sawrkar ruahmanna tha taka lo thlawp turin khawtlang hotute ngen an ni a. CCC leh CCCC indaih lohna avanga hlauhthawnna awm thei nia lang pawh sawrkarin theihtawp chhuaha hma a lak thu leh engmah hlauhthawnna tur a awm loh thu tarlan a ni.

Meetinga tel MLA pathum Pu Vanlalhlana, Pu C. Lalmuanpuia leh Pu C. Lalsawivungate chuan sawrkarin mass testing a kalpui tur chu tha an tih thu leh CCCC Mizoramin kan nei chu ramdanga an tih ve theih loh, kan thawhho tlanna a thatzia tilangtu a nih thute an sawi a, sawrkarin hripui leng laka mipuite himna atana theihtawp a chhuahna leh ral hmatawnga thawktu zawng zawngte inpekna leh thawhrimnaah lawmthu an sawi a ni.