Vawiin khan Chief Minister's Conference Hall-ah Health Minister Pu Lal Thanzara hovin  Mizoram Institute of Medical Education & Research (MIMER) chungchanga hmalakna leh hmachhawp pawimawh te sawiho a ni a.

Health Minister chuan Mizorama Medical College chu tun dinhmunah leh hun lo kal zel tura thil tangkai tak leh mipui tan hamthatna tam tak thlen thei tur a nih avangin MIMER hi hawn thuai a nih theih nan Sorkar chu a hmanhmawh in theihtawp a chhuah thu leh, hemi a mawhphurtu department leh mimal pawh theihtawp an chhuah a beisei thu a sawi a. Medical College din tura hmalakna kal lai rawn endiktu MCI (Medical Council of India) ten report an siam chu ngun taka ngaihtuah a, Medical College atan mamawh hrang hrang hlenchhuah tur an beisei te chu tihhlawhtlin thuai a nih theih nan meeting a kalte chu theihtawp chhhuah turin a sawm a ni.

Medical Council Of India (MCI) chuan November ni 21 leh 22, 2017 khan Falkawn Medical College hi lo enfiah tawhin, report hi December ni 14, 2017 khan IMC Executive Committee chuan a ngaihtuah leh ni. Vawiin meeting-ah hian Pu RL Rinawma, Principal Adviser to Chief Minister, Pu Lalrinliana Fanai, Commissioner/Secretary, H&FW, Dr. F. Lallianhlira, Principal Director, H&FW bakah Health Department officials leh sawrkar mi pawimawh te an tel bakah MIMER Advisor Dr. NK Mohanty, North DMC Medical College Dean ni mek bawk chu a tel a ni.