No.7063/2020-2021

Vawiin chawhma khan SAD Conference Hall, MINECO ah Mizoram COVID-19 dinhmun thlirho a ni a, he hun hi Health & Family Welfare Minister Dr. R. Lalthangliana'n kaihruaiin, Home Minister Pu Lalchamliana, MOT Chairman Dr. ZR Thiamsanga, MLA, Chief Secretary Pu Lalnunmawia Chuaungo bakah Addl DGP leh COVID-19 dona kawnga hmalatu department hrang hrang hotute,  Indian Medical Association (IMA) leh Mizoram Kohhran Hruaitute Committee (MKHC) aiawhte an tel.

Vawiin thlirhonaah hian hunpui (krismas leh kumthar) vuakveta mizoram dinhmun thlirlet niin mipuiten sawrkar ruahmanna ngai pawimawha an zawm that avangin tual chhunga hri kai thar an tlem tih sawilan a ni a, mipuiten thu an awihna leh sawrkar an tawiawmnaah lawmawm an tih thu leh hrileng dona kawnga thawktu hrang hrang sawrkar hnathawkte, tlawmngai pawlte, Local Task Force leh kohhran hruaitute bakah sakhaw hrang hrang hruaitute chungah lawmawm an tih thu an tarlang a, hunpui chhunga kan dinhmun diktak erawh karleh tawp lamah a hriat tan dawn avangin SOP hman lai mek kalpui chhunzawm rih tur a nih leh nih loh bakah, thil pawimawh hmanhmawhthlak zualte chu State Executive Committee of State Disaster Management, Mizoram-in a rang lama ruahmanna an lo siam turin tih a ni.

COVID-19 hri danna (vaccine) chungchang tarlan niin India ramah vaccine chi hrang hrang 9 enchhin (trial) neih tawh a ni a, pre-clinical stage ah vaccine 3 awmin, clinical stage ah vaccine 6 a awm thu leh heng zinga vaccine 2 - Covishield leh Covaxin chu sawrkar laipuiin hman phalna a pek tawh thu tarlan a ni a. Heng vaccine 2 te hi beisei reng a nih tawh thu tarlan a ni.

Vaccine dawng hmasa tur chungchangah State sawrkarin thuneihna a neih loh avangin sawrkar laipuiin hemi chungchanga hmala tura a ruat  National Expert Group on Vaccine Administration for COVID-19 (NEGVAC) ruahmanna zawm a nih tur thu sawi a ni a. NEGVAG ruahman dan chuan COVID-19 vaccine dawng hmasa tur chi thum an awm a : 

1) Healthcare Workers (damdawiin hrang hranga thawktute leh COVID-19 veite buaipuitu Health department hnuaia mite, Anganwadi workers telin) an ni a, database peihfel tawh niin cemtral lamah thawn tawh a ni a, database ah hian mi 14,000 vel telh an ni thu tarlan a ni. 

2) Frontline Workers - Home Department in frontline workers database hi an buaipui mek a, frontline workers zinga telh theih tur chin khauh taka bithliah a nih avangin uluk taka buaipui mek a ni. 

3) Prioritised Age Group (kum 50 chung lamte leh kum 50 hnuai hriselna dinhmun thalote) hi database siam dan tur leh a tel thei tur chin inkaihhruaina sawrkar laipuiin an la duan fel loh avangin an thu leh hla ngaihchan mek a ni.

Database a tel lo chuan vaccine an dawng thei dawn lova, vaccine pek an nih hunah pawh inthlanpuia vote thlak dan ang deuha Identity Card nen khauh taka kalpui tur a ni a, vaccine an dawn veleh minute 30 chhung observation room-ah awm tir an nih tur thu tarlan a ni a. Hemi atana inbuatsaihna "dry run" pawh India ram puma State Capital zawng zawngah January ni 2, 2021 khan neih a ni tawh a, January ni 8, 2021 hian district headquarters zawng zawngah neih leh a ni ang.

COVID-19 dona kawnga mitlawmngai inpe (volunteers) mi 687 te lawmman pek a nih tawhn thu meeting-ah hian tarlan a ni a, heng volunteers te hi December, 2020 thlenga rawih tur an nih laiin Vaccine sem hunah thawktu mamawhna a nasat dawn avang leh Mizoram dinhmun  thlira inthlahdah lova tan lak chhunzawm zel a tula a lan vangin March, 2021 thlenga chhawr chhunzawm a tul thu tarlan a ni a, a tul angin sawrkar hotuten thutlukna an siam ang.

COVID-19 hrik thar "U.K strain" vei India ramah mi 38 an awm tawh thu tarlan a ni a. Mizoramah pawh United Kingdom atanga lo haw mi 7 an awm tawh a, anni hi Aizawl khawpuia cheng vek an ni a, RT-PCR test annegative vek tawh bawk tih sawichhuah a ni a, heng mite hi engemawchen chhung an dunhmun la thlithlai a ngaih thu tarlan a ni bawk. COVID-19 hrik dang "South Africa COVID-19 Variant" pawhin Japan a thlen tawh thu meeting-ah hian tarlan a ni.

Mizoramah COVID-19 hri kai, negative result an neih hnu a damdawiin/CCC atanga chhuahtir tawh, a hnu a hri kai nawn leh mi 8 an awm tawh thu tarlan a ni bawk.

Tun dinhmunah TrueNAT test kit 3528 neih a ni a, test kit 4800 lo thleng leh tur a awm a. RT-PCR test kit 18,990 kawl mek niin, RNA extraction kit 15,000 15,000 kawl mek a ni bawk a, test kit leh ppe bakah COVID-19 dona atana hmanraw mamawh chungchangah thlaphanna tur a awm rih loh thu tarlan a ni.

Meeting-ah hian Covid Care Centre hrang hranga ei leh in senso zat tarlan a ni a. September, 2020 ah cheng nuaih 35, October, 2020 ah cheng nuaih 26, November, 2020 ah cheng nuaih 46 leh December, 2020 ah cheng nuaih 23 sen a nih thu tarlan a ni.