No.150/2021-2022

Aizawl, 15th April, 2021 : Vawiin chawhnu khan SAD Conference Hall, MINECO ah Mizoram COVID-19 dinhmun thlirho a ni a, he hun hi Health & Family Welfare Minister Dr. R. Lalthangliana'n kaihruaiin, Home Minister Pu Lalchamliana, MOT Chairman Dr. ZR Thiamsanga, MLA, Chief Secretary Pu Lalnunmawia Chuaungo bakah COVID-19 dona kawnga hmalatu department hrang hrang hotute, Indian Medical Association (IMA) leh Mizoram Kohhran Hruaitute Committee (MKHC) aiawhte an tel.

Vawiin thlirhonaah hian India rama COVID-19 second wave lo hluar leh mekin Mizoram a nghawng dan sawiho a ni a, tunhnaia Mizorama COVID-19 positive case pun dan report ngaihthlak niin March ni 29, 2021 atanga April ni 15, 2021 inkarah positive 257 hmuhchhuah niin Lengpui Airport-a lo thleng zingah positive 110 hmuhchhuah a ni a, an zinga 84 hi Lengpui Airport an rawn thlen hlima Lengpui Airport Screening Point a RAgT hmanga hmuhchhuah niin, midang 26 hi Lengpui Lengpui Airport Screening Point a RAgT negative, a hnua positive tih hmuhchhuah leh an ni. Vairengte kaltlanga rawn lut zingah positive 29 hmuhchhuah niin an zinga 23 hi screening point-a positive tih hmuhchhuah an ni a, 6 dang hi screening point-a negative, a hnua positive leh an ni. Kanhmun screening point-ah positive 2 hmuhchhuah an ni a, Zokhawthar kaltlanga rawn lut screening point-a negative, a hnua positive leh si 1 a awm bawk. Positive hmuhchhuah thar zawng zawng zinga 115 hi tualchhunga hmuhchhuah an ni. Kumin January thla khan positive 156 hmuhchhuah an ni a, February ah 51, March ah 53, April thlaah ni 14 thleng positive 246 hmuhchhuah an ni.

Nimin April ni 14, 2021 kha India rama positive hmuhchhuah tam ber ni niin mi 2,00,739 hmuhchhuah a ni a, nikhat thil thua COVID-19 vanga nunna chan tam ber ni a ni bawk a, mi 1,038 in nunna an chan a ni.

Tun dinhmunah lockdown puan rup rup a remchan loh avangin a tul dan azirin containment zone/micro-containment zone puan thin a ni ang.

Vawiin meetingah hian COVID-19 positive te enkawlna tur Covid Care Centre (CCC) ruahman belh chungchang leh Dedicated COVID Hospital chungchangte sawiho a ni a, CCC tur hi tunah hian hual lawk mek niin mi 240 vel enkawl theihna Aizawlah hual lawk tawh a ni a, hmun dang pawh en belh zel a ni a. District hrang hrangah pawh hmalak mek a ni.

Mizorama COVID-19 hri hluar chak dan thlirin mipuite chetvelna khuahkhirh a tul bakah chhungkua, thianho leh pawl anga thiltihkhawm leh puipunna huaihawt chungchangte sawiho a ni a, sawrkarin a tul angin ruahmanna a siam zui dawn a ni. Mizoram luhka (entry point) hrang hrang atanga rawn lutte uluk leh khauh lehzuala lo endik a tul thu sawi a ni a, community quarantine facility chungchang leh man chawia in-quarantine duhte tana awmna tur paid quarantine facility ruahman dan turte sawiho a ni a. BSF sipai Assam leh West Bengal inthlanpuia duty lo haw te quarantine dan tur sawiho a ni bawk. COVID-19 sample test tun aia nasa zawka kalpui a tul thu leh random testing kalpui a tul thu sawi niin sawrkarin a rang lamin ruahmanna a siam ang.

COVID-19 positive te phur kualtu Ambulance service indaihlohna chungchang pawh sawiho niin, Tata Trust atangin ambulance 4 dawn thuai a nih dawn thu tarlan a nih bakah a tul anga indaihlohna phuhru tura ruahmanna siam tum a ni a, Aizawl Civil Hospital thuneitute report danin June ni 8, 2020 atangin nimin thleng khan ACH ambulance 3 hmangin dam lo 2345 an phur a ni.

COVID-19 vaccine pekchhuah mek chungchang report ngaihthlak niin April ni 14, 2021 thleng khan dose 1,20,558 pek chhuah a ni tawh a, 1st dose la tawh zat hi 91,547 niin an zinga 29,011 hian 2nd dose an la tawh a ni. Kum 45 chunglam mi 56,947 hnenah vaccine 1st dose pek an ni tawh a, tun thla chhung hian pek kim beisei a ni. Vaccine khaihlak vanga harsatna tawh chungchangah Health Minister leh Chief Secretary te hmalaknain vaccine dose 50,000 dawn belh a ni a, karleh hian dose 50,000 dang dawn leh beisei a ni. Vaccine hi sawrkarin a thlawnin a pe a, hetih rual hian Ministry of Health & Family chuan private hospital-ah pawh vaccine pekchhuah hi a remti tawh a, MoHFW thupek angin heng private hospital-ah te hian vaccine dose khat zelah Rs. 250 chawi tur a ni hung. Mizoramah chuan LRM Hospital, Ramhlun North leh Presbyterian Hospital, Durtlangah vaccine hi a lak theih tawh a, reiloteah Trinity Hospital pawhin an pe chhuak thei tawh dawn a ni.

Mizoram (Containment and Prevention of Spread of COVID-19) Act, 2020 dan bawhchhia man zat chu April ni 14, 2021 thleng khan mi 82744 an ni tawh a, an pawisa chawi zat hi Rs. 1,66,81,000 a tling tawh a ni.

COVID-19 dona kawnga indaihlohna chungchang sawiho niin hemi chhawk zangkhai tura volunteers lak leh chu Chief Minister-in a phal tawh thu tarlan a ni a, COVID-19 vaccine la tawh Mizoram pawn atanga lo haw/lut te chu an rawn luhna screening point-ah RAgT hmanga test leh vek tur a nih thu sawi a ni a, Lengpui Airport-a lo thlengte phurh haw dan tur chungchang sawi lan niin a tul angin ruahmanna siam thuai a ni ang.

COVID-19 second wave laka kan inven tlan theihnan uar tak leh ngawrh lehzuala mipuite hnena inzirtirna kalpui thar leh a tul thu sawi niin, a tul anga hmalak chhunzawm nghal a pawimawh thu tarlan a ni a. Mipuite pawhin awmhmuna kan tih ve theih COVID appropriate behaviour - Mask vuah that, kut silfai uluk leh social distancing bakah sawrkarin inkaihhruaina a siam Standard Operating Procedure (SOP) te a hma aia uluk lehzuala kan zawm a ngai a ni, an ti.

Mizoram Kohhran Hruaitute Committee (MKHC) hruaitute pawhin COVID-19 dona kawnga sawrkar hmalakna tha an tih thu sawiin, sawrkarin mipuite himna atana ruahmanna an siam apiang chu tha taka zawm zel an tum thu an sawi a ni.