No.3702/2020-2021

Vawiin chhun dar 12:30 khan Health & Family Welfare Minister Dr. R. Lalthangliana hovin sawrkar hotuliante SAD Conference hall, MINECO-ah emergency meeting neiin an thukhawm a, darkar 24 chhunga COVID-19 vei Mizoramah an pun tak hluai avanga hmalak tul leh ngaihtuah ngaite an sawiho a. He thutkhawmna ah hian Social Welfare Minister Dr. K. Beichhua, Medical Operational Team Chairman Dr. ZR Thiamsanga, Chief Secretary, DGP, Home Secretary leh Health Secretary bakah Home department, Health department leh Task Group hrang hrang hotute an tel a ni.

Emergency meeting koh a nih chhan sawiin Health Minister Dr. R. Lalthangliana chuan nimina swab sample test result chhuakah mi mi 55 lai COVID-19 positive hmuhchhuah a ni a, nikhat thilthu a Mizorama COVID-19 vei hmuhchhuah tam ber a la ni a, kan hmalam hun tur a hriat loh a, nikhat thilthuah COVID-19 vei pung thur thur thei dinhmunah kan din avangin COVID-19 veite enkawlna tura kan ruahman sa Covid Care Centre (CCC), Dedicated Covid Health Centre (DCHC) leh Dedicated Covid Hospital (DCH) te hian min dawl zo dawnlo a, ngaihtuahna uluk taka kan sen a tul bakah para-military force te awmdan tur pawh ngaihtuah a pawimawh dawn a ni, a ti a. Chief Minister Pu Zoramthanga thahnemngaihna leh thilphalna avangin District 10 a dah tur Truelab Quattro Real Time Quantitative Micro PCR Machine pawh lei fel tawh a ni tih sawiin, tun kar chhung hian Mizoramah rawn phurh thlen a nih a beisei thu a sawi.

Social Welfare Minister Dr. K. Beichhua para-military force te zingah COVID-19 vei an tam chak em avangin mipui pawh kan thla a muanglo a ni, a ti a. Fimkhur tura hriattir an pawimawhzia sawiin kan thawhrimna leh kan hahpuina zawng zawng hi zankhat thilthuah engmahlo ah a chang palh ang tih a hlauhawm a, kan fimkhur tlan zui zel a ngai takzet a ni, a ti.

Mizoram chhung district hrang hranga CCC leh DCHC dinhmun thlir niin Aizawl-a Covid Care Centre hrang hrang Tribal Art Centre, Tanhril (khum 50 awmna), Beraw CCC (khum 39 awmna), Zokhawsang CCC (khum 46 awmna, Assam Rifles ho inenkawlna), Multipurpose Centre, ITI (khum 49 awmna) ruahman fel tawh a nih thu tarlan a ni a. Synod Camping Centre, Neihbawih, Sihphir chu khum 80 vel dah theih tur beisei niin tunah hian a enkawltute nen indawr mek a nih thu sawilan a ni bawk. Heng bakah hian Thenzawla AYUSH Hospital (khum 40 awmna) leh Lengpuia AYUSH Hospital (khum 8 awmna) te chu CCC atan hman an ni bawk.

Serchhip-a Nursing School sak zawh tawh la luah loh chu CCC atan ruahman mek a nih thu tarlan niin tunah hian chei that mek a ni a, kawlphetha leh tui lakluh fel a ni tep tawh a, tun kar chhung hian zawhfel beisei niin khum 100 awm thei tura ruahman a ni.
Dedicated Covid Hospital atana hman mek State Referral Hospital, Falkawn - Zoram Medical College (SRHF - ZMC) ah hian COVID-19 vei enkawlna tur khum 64 a awm bawk a ni.

Paramilitary Force leh civil mite Covid Care Centre khata dah pawlh tawh loh tura ruahmanna siam a ni a. Serchhip Nursing School hi BSF ho dahna bik atan ruahmanna siam niin, AYUSH Hospital, Thenzawl leh Tribal Art Centre, Tanhril chu paramilitary-force leh sipai dang COVID-19 veite dahna tura ruahman niin, Zokhawsangah Assam Rifles ho inenkawlna CCC a awm bawk a ni.

Civil mi COVID-19 veite enkawlna atan Beraw CCC leh Multipurpose Centre, ITI chu hman tura ruahman a ni.

Mizorama COVID-19 vei hmuhchhuah zinga hmun li a thena hmun thum vel zet mai Para-military force te an nih avangin vawiin emergency meeting chuan para-military force ho zawm tur quarantine inkaihhruaina mumal tak siam a, anmahni pawh COVID-19 chungchanga hriattur pawimawhte hrilhfiah nawn leh tulin a hria a, hemi atan hian hmalak nghal tum a ni.

Para-military force te hi May ni 20, 2020 atang khan Mizoram sawrkar chuan vawi engemawzat lehkha thawnin Mizoram chhunga an veivah dan pawh ti tlem turin leh fimkhur turin a hriattir thin a, Assam Rifles hi August ni 15, 2020 hma chu Mizoram pawn atanga rawn lut lo turin anmahni lamin ruahmanna an siam tawh a, BSF pawhin battalion insawn tur an thulh lailawk tir rih a, loh theihloh thilah lo chuan Mizoram chhunga rawn lut rihlo tura hriattir niin an rawn luh pawhin an hming nen chhinchhiah vek an ni tawh a ni.

Tukina swab sample test result chhuaka The Grand Hotel-a thawk mipahnih COVID-19 positive chungchang pawh tarlan niin heng positive pahnihte hi a hma a sample test negative tawh te an ni a, tunhnaiah COVID-19 mild symptoms an neih avangin test leh an ni a. Anni hi Hotel-a thawk, awmchilh deuh chawttu an ni a, positive an ni tih hriat a nih veleh an thawhna Hotel lockdown nghal niin contact tracing tihnghal a ni a, Hotela awm mekte swab sample pawh vawiin khan lak nghal vek niin ZMC laboratory-ah test nghal tura thawn a ni.

July thla chhung khan Lengpui Airport atang mi 1666 in Mizoram an thlawh chhuahsan a, mi 1648 an lo thlawklut tih meeting-ah hian tarlan a ni bawk.