Tukin zing khan High School Field, McDonald Hill, Zarkawt-ah Health Minister Pu Lal Thanzara hovin World Malaria Day puala hun hman a ni a. Health Minister hian World Malaria Day puala buatsaih Bike Rally a vailiam nghal a ni. Tunkum atana he ni thupui chu ‘Ready to beat Malaria’ (Malaria hneh turin I inpeih ang u) tih a ni a. He hun hi H&FW hnuaia State Vector Borne Diseases Control Programme (SVBDCP) buatsaih a ni.

Health Minister Pu Lal Thanzara chuan World Health Organisation (WHO)-in kum 2017 report-a a tarlan dan chuan kum 2016 khan khawvel pumah 216 million-in malaria an vei a, nuai 4 chuangin nunna an chan bawk a ni tiin khawvel pumah malaria vei an la tam hle a ni, a ti a. Malaria hi inven theih leh tihdam theih natna a ni a, thosi laka kan inven that te, thosi inthlah pung tur kan ven te a tul a ni tiin thosi seh laka inveng tur chuan thosilen hnuaia mut bakah thosi hnawh kianna hal chi leh taksa chulh chi a hman theih a ni, a ti a. Health Department chuan kum 2016 khan thosilen, thosi that thei damdawia chiah sa (Long Lasting Insecticidal Nets LLIN) chu a thlawnin 5,29,000 zet an sem a, heng thosilente hi kum nga emaw vawi 20 suk daih tura siam an ni, a ti a. Malaria hi damlo thisen tlemte exam-a finfiah theih a ni a, sawrkar damdawi in, PHC, CHC, Sub-Centre-ahte a thlawna thisen exam theih niin malaria damdawi dah nghal bawk a ni, a ti.

Sawrkar laipui chuan kum 2030-ah India ram hi Malaria awm lohna ramah siam a tum mek a, hemi tihlawhtling tur hian Mizoramah pawh nasa takin hma lak a nih thu Health Minister chuan a tarlang a. Malaria hi hma taka hmuhchhuah a nih a, tha taka enkawl a nih chuan awlsam taka tihdam theih a ni a, hmuhchhuah har erawh chuan thihna hial thlen theitu a nih thu Minister chuan a sawi a. Malaria natna titlema, um bo tur hian Health Department-a thawkte inpekna chauh a tawk lova, Zoram mipui bakah pawl hrang hrang te thawhhona a pawimawh a ni, a ti bawk.

Health & Family Welfare Principal Director Dr. F. Lallianhlira chuan thu sawiin Mizoram-a malaria do hna hi H&FW hnuaia State Vector Borne Diseases Control Programme (SVBDCP) kalpui a nih thu sawiin malaria natna bakah dengue leh chikungunya natna do hna an kalpui tel thu a sawi a. Sawrkar laipui  chuan malaria hi kum 2030-ah um bo a tum a, hemi atan hian Intensified Malaria Elimination Project (IMEP) chu GFATM (Global Funds for AIDS, TB & Malaria) hnuaiah kalpui mek a ni, a ti a. Malaria umbo a nih theih nan DDT kahte, those pian theihna ti bo tura hmalakte, LLIN (Long Lasting Insecticidal Nets) semte leh mipuite hnena zirtirna hrang hrang pekte hmanga kalpui thin a nih thu a sawi bawk.

Malaria (sikserh) hi thosi chi khat, Anopheles nu, malaria hrik pai seh atanga kai a ni a, heng thosite hi tuifim tlingahte tuiin an inthlahpung chak em em a ni. Malaria vei lanchhuah dan chu khawsik leh luna a ni tlangpui a. Luakchhuak leh luak a tel fo bawk. Malaria hrik thluaka a luh chuan nikhawhrelovin a awm theih bakah thihna hial a thlen thei a. Malaria hrik hian kal (kidney) hnathawh a tichhe thei bawk.

Mizoramah hian kum 2017 khan malaria vei mi 5,715 awmin mi 4-in an nunna an chan a, kum 2016 aiin kum 2017-ah malaria natna hi Mizoramah za zelah 24.63-in a tla hniam a, malaria vanga thihna pawh za zela 55.56 in a tlahniam a ni. Kum 2018 March thla thleng hian malaria vei mi 426 an awm tawh a ni.

 Intensified Malaria Elimination Project (IMEP) hnuaiah state hrang hrang hmasawn dan tur kailawn a awm a, chungte chu  

1)Category 0: Prevention of Establishment Phase

2)Category 1: Elimination Phase

3)Category 2: Pre-Elimination Phase

4)Category 3: Intensified Control Phase

Tun dinhmunah chuan Mizoram hi Category 3: Intensified Control Phase-ah awmin kum 2020 hma ngeia Category 2-a lut chho tura hmalak mek a ni.

Programme hi NHM Director Dr. Lalrozama, IAS in a kaihruai a, H&FW Joint Director Dr. Vanlalsawma chuan lawmthu sawina in hun a khar a. H&FW senior officerte leh hnathawkte an tel a. Health Minister hian Bike Rally (Aizawl Thunders, Aizawl Bullet Club) a vailiam nghal a. Anni hian veng hrang hrang-ah malaria dona hi an au chhuahpui a ni.