362/2022-2023

Aizawl, 30^th April, 2022 : Health Minister Dr R. Lalthangliana hovin tukin dar 7:00 khan DHS Conference Hall, Dinthar Veng, Aizawlah World Malaria Day pual inkhawm neih a ni a. He hun hi National Centre for Vector Borne Disease Control, Health & Family Welfare Department-in an buatsaih a,  Mizoram District hrang hrang te chuan he ni hi April 25 khan hmangin, remchan zawkna avangin State-levelah chuan vawiin hian hman a ni thung. 

He hunah hian khuallian Dr R. Lalthangliana chuan thu sawiin Health Department chu sawrkar laipuiin a ruahman Programme hrang hrang ngah ber an ni a, mipuite hriselna kaihhnawih thil vek a nih avangin an pawimawh em em a, vanduaithlak takin COVID-19 hripui leng vangin kum 2 zet kan duh angin hma kan la thei lova, tunah chuan kan dinhmun  a ziaawm ta rih a, theihtawp chhuahin mar takin tan kan lak a ngai a ni, a ti a. Mizoram chu India ramah malaria vei leh thihpui tam State zingah a la tel avangin tan kan lak nasat a la ngai a ni a ti. 

Khuallian chuan sawrkarin theihtawp chhuaha hma a lak rualin mipuite pawhin tih tur kan nei ve a ti a, Malaria natna hluar hun fur kan thleng chho tan dawn a, a bik takin malaria vei tamna hmun Mizoram khawthlang lam, Bangladesh leh Tripura hnaih lamah uar lehzuala mipuite zirtir a ngai a, kan in theuh Thosi kah hun laia lo kah tirte, damdawi a thosi len chiah te, those len damdawia chiah sa kan dawn tha taka zar zui te hi kan tih ve theih a ni a, heng bakah hian kan in leh a chheh vela thosi pian theihna awm reng reng tui tling leh a dangte tih bo leh khawsik kan neih apianga rang taka thisen exam tir leh damdawi tha taka ei te hi he natna kan do hneh theihna tur a kan mawhphurhna a ni tih mipuiten hre tharin, he natna kan do hlawhtlin theihna tur chuan sawrkar hmalakna hrang hrangte hi mipuiten tha taka min thlawp a ngai a ni, a ti. 

Minister chuan India Sorkarin kum 2030-ah chuan India ram hi Malaria natna awm tawh lohna rama siam tumin hma a la a, chumi rual chuan Mizoram Sorkar pawhin theihtawpin hma a la mek a ni, a ti a. Malaria natna tirem tur hian Health Department-a thawkte inpekna chauh a tawk lova, sawrkar department hrang hrangte, Zoram mipui leh chhungkaw tinte bakah Kohhran leh Pawl hrang hrang te kan tan tlan a ngai vek a ni, tiin theihtawp chhuaha thawhpuiah a sawm a ni. 

World Malaria Day hi World Health Organization (WHO) bultumin kumtin April ni 25 ah Theme (Thupui) nei a hman thin a ni a. Kum 2022 thupui chu “Harness Innovation to Reduce the Global Malaria Disease Burden and Save Lives” tih a ni a, he thupui in a tum ber chu “Ruahmanna thar nen a, Khawvel puma Malaria natna avanga harsatna leh thihna tih hniam” a ni. Wolrd Health Assembly chuan kum 2007 khan he ni hmang tur hian a rel a, kum 2008 atang khan kumtin Khawvel pumah hman thin a lo ni ta a ni. 

He ni hi khawvel pumah urhsun taka hman thin a ni a, Mizoramah pawh District hrang hrang ah hman niin, District tin a PHC tin hnuaia Malaria tamna khua (endemic villages) thlan chhuah niin, heng khuaah te hian Mizoram State Rural Livelihood Mission, Rural Developtment Department hnuaia Self Help Group te nen tangkawp a hman a ni. 

He ni denchhen hian April thla chhungin Malaria dona atana hmalakna hrang hrang kalpui mek niin; khawtlang mipui leh Pawl hrang hrang te nen Advocacy meeting te neih anih bakah, School level Painting & Quiz competition, Awareness Campaign, Wall Painting, Banner/Poster Display bakah Source Reduction Drive (Thosi pian theihna tui tling tihbo hnatlang) te neih a ni bawk. District tinah hlawkthlak taka he hun hi hman a ni. 

World Malaria Report, 2021-in a tarlan danin kum 2020 khan khawvel pumah Malaria vei mi 241 million (Vaibelchhe sawmhnih pali leh Nuaih sawm) an awm a, Malaria avanga nunna chan mi 627000 (Nuaih ruk sing hnih leh sang sarih) lai an awm a ni. Malaria vei hmuhchhuah zinga 95% hi Africa khawmualpuia cheng an ni a, a thihpui zinga 96% hi Africa khawmualpuia mi bawk an ni. Malaria thinpui zinga 85% hi naupang kum 5 hnuai lam an ni. 

Mizoramah chuan kum 2021 chhungin Malaria natna vei mi 5637 awmin, nunna chan mi 10 an awm a, nunna chante hi June atanga September thla inkara thi an ni. Kumin 2022 January leh February thla khan Malaria natna vei mi 354 an awm tawh a, nunna chan erawh an awm lo a ni. District hrang hrang zingah Mamit, Lunglei leh Lawngtlai district te chu malaria hluarna (API 10 aia sang) an ni. 

Tukina World Malaria Day pual inkhawm hi Pu R. Lalramnghaka, Secretary, H&FW chuan a kaihruai a, Dr. Eric Zomawia, Mission Director, NHM in Mizoram Malaria dinhmun tlangpui powerpoint hmangin a sawifiah a, Dr. Lalremmawii, Joint Director (Malaria) chuan Programme hmalakna sawina hun a hmang bawk. Dr. C Lalzepuii, Joint Director (Planning) chuan lawmthu sawina hun hmangin he hun hi a khar a ni.