No.1654/2021-2022

Aizawl, 1st August, 2021 : Health & Family Welfare department changtu Minister Dr. R. Lalthangliana chuan vawiin khan tun hnaia Aizawl khawpuia COVID-19 hri kai pun thar nasatna veng hrang hrang - Mission Vengthlang, Lawipu, Maubawk, Bungkawn Vengthar, Chawnpui, Chawlhhmun, Ramhlun Vengthar, Ramhlun Sports Complex, Muanna Veng leh Thuampui a tlawh.

Veng hrang hrang a tlawhnaah hian Local Task Force hruaitute leh khawtlang hruaitute nen inkawmhona hun tha tak an nei a. Veng chhungin hripui leng dona kawnga hma an lak dante inhrilhfiah niin, an harsatna tawhte leh mamawhte bakah hmalak chhunzawm zel dan turte an sawiho a ni.

Health Minister veng hrang hrang a tlawhnaah hian lockdown kar khat pawhsei a nih chhan sawiin, kan boruak kan thlirin hri leng inkaichhawnna ah a vawrtawp kan thlen mek laia inthlahdul hi a hlauhawmin kan hre si a, hreh tal leh inthlahrung takin kar khat chhung kan boruak ngaichang leh ila kan ti a, kan pawtsei leh a ni, a ti a. Mipuite leh khawtlang hruaitute pawhin lo hrethiam hram hram turin a ngen tih a sawi a ni.

Health Minister-in veng hrang hrang a tlawhnaah hian hri kai tharte enkawlna tur hmun chungchang leh thil pawimawh dangte sawiho a ni a. CCCC siam thar tur veng te nen pawh hmalak dan tur leh ruahmanna an siam dan te sawiho niin, Home Isolation a awmte chungchangah chhungkaw dinhmunin a zir a nih chuan home isolation a in dah a uluk taka in vil zui a pawimawh tih sawi a ni a. CCCC a awmte awmze nei leh felfai zawka enkawl leh vil dan turte sawiho niin, CCCC atana mamawh sawrkarin a lo pek leh hawh tir theih turte an sawiho bawk a ni a, Health Minister chuan an tih ve theihna chin ang angah theihtawp an lo chhuah zel tur thu a sawi a ni.

Health Minister hi Dr. F. Lallianhlira, Principal Director, H&FW, Dr. Lalthanpuii, SNO (MH), CMO Aizawl West Dr. Thani Pachuau, CMO Aizawl East Dr. Hmingthanmawii, leh Dr. Chawnghmingliana, General Secretary, Indian Medical Association, Mizoram Chapter ten an tawiawm a ni.

Attachment

  • Loading attachment...