Nizan khan Health Minister Pu Lal Thanzara chuan Breast Cancer Awareness atana buatsaih Exposé fashion show Pachhunga University College Multipurpose Hall-ah a hmanpui a. He hunah hian Cooperation Minister Pi Vanlalawmpuii Chawngthu chu khual zahawm a ni a, Pu Lalruatkima MLA pawhin a hmanpui a ni.
Khuallian Health Minister Pu Lal Thanzara chuan thu sawiin Breast Cancer Awareness program thalaite hip thei zawnga hman ani chu lawmawm a tih thu leh Mizo designer-te kutchhuak phochhuahna hun hman ani chu lawmawm a tih thu a sawi a. Hnute cancer chu hriatchhuah hma chuan enkawl dam theih anih thu sawiin a vei te pawhin hma taka an inhriatchhuaha enkawl dam an nih theih nan awareness uar taka kalpui a tul thu a sawi a ni.
Khualzahawm Cooperation Minister Pi Vanlalawmpuii Chawngthu pawhin he hunah hian thu a sawi a, hnute cancer chu hmeichhia leh mipaah a awm theih veve avangin mahni in check dan inhrilhhriat zel a pawimawh thu sawiin hlauh leh zah thila la lova mahni uluk taka in check thin turin mipuite a chah a ni.
Expose fashion show hi Mizo NIFTians Association leh Mizoram State Cancer Institute (MSCI) tangkawpin Breast cancer awareness atana an buatsaih a ni a. He hunah hian hnute cancer mahni a in check dan leh in enkawl dan te leh hnute cancer vei thin dam tawh te chanchin ngaihthlak a ni a. Expose fashion show hi nikum 2016 khan Breast Cancer Awareness atan vek lo neih tawh a ni bawk.
