No.4120/2021-2022 

Aizawl, the 26^thFebruary 2022 : Google.org, Program for Appropriate Technology in Health (PATH), Seattle, USA leh GiveIndia te tangkawp rawn pek Pressure swing adsorption (PSA) Oxygen Generation Plant (800 LPM), Christian Hospital Serkawn, Lunglei ami chu vawiin khan H&FW Minister Dr R. Lalthangliana’n a hawng.

Hawnna inkhawmah hian Lunglei HPC Vice Chairman Pu Lawmawma Tochhawng, Bamboo Development Board Vice Chairman Dr K Pachhunga, MYC Chairman Dr Vanlaltanpuia, Lunglei DC Pu Kulothungan A leh official dangte bakah BCM leh CHS hruaitute leh thawktute an tel a ni.

Oxygen plant hawn puala inkhawm buatsaihah Health Minister Dr. R. Lalthangliana chuan Christian Hospital Serkawn (CHS) chu Mizorama damdawi in hlun ber pakhat a nih bakah nakum maiah an kum 100 na Centenary an thleng tur chu a ropuiin a lawmpui takzet thu a sawi a. Baptist Church of Mizoram (BCM) ten mipuite hmakhua ngaia Covid-19 positive te enkawlna hmun changtlung tak Baptist Covid Care Centre (BCCC) an ruahman chu ropui a tih thu sawiin BCM hruaitute leh thawktute zawng zawng chungah lawmthu a sawi a. BCCC enkawl chu thil namai lo leh sum leh pai senso pawh a hautak hle a ni tih Sawrkarin a hriatpui a ni tiin hun lo kal zel tura an mamawh dangte pawh sawrkarin a theih anga ruahman pui a tum thu a sawi a ni.

Covid-19 hrileng do kawnga theihtawp chhuah tu kohhran te, tlawmngai pawl te, khawtlang hruaitute leh mimal tlawmgnaite chungah H&FW Minister chuan lawmthu a sawi a. Mizoram chu India ram state te zingah Covid test ti tha leh ti tam ber te zinga mi kan nih thu leh tun dinhmunah test nuai 18 chuang tih tawh niin hei hi Mizoram population atanga chhut chuan 160% chuang a ni a. Mizorama Covid-19 case neih tawh zawng zawng chu 2,12,217 (26/02/22 - 7am report) niin kan positivity rate hi 11% vel a ni a. Testing kan tih tam avangin positivity rate pawh hi a sang lo theilo a ni, a ti a. Hri kai tam lam ai mahin nunna chan an tam leh tam loh ah hmalakna a that leh that loh hi min teh a, hetih kawngah hi chuan a ti tha kan ni a. Mizoramah Covid-19 avanga nunna chan mi 655 awm tawhin death rate 0.31% hi India rama hniam berte zinga mi a ni, a ti bawk. 

Oxygen plant bun tura hmalatu te Google.org, Program for Appropriate Technology in Health (PATH), Seattle, USA, GiveIndia te leh CHS thawktute leh Lunglei District MLA leh official-te chungah H&FW Minister Dr R Lalthanglian chuan lawmthu sawiin Mizoram chhimlam District mipuiten tangkai taka an hman ngei nan duhskana a hlan a. Christian Hospital Serkawn-a hman tur Oxygen Concentrator pahnih a hlan nghal a ni.

Dr Lalramzauva, Director, Medical & Health Department, BCM leh Pu Victor Lalrinawma Sailo, Director, Property Department BCM ten Technical Report an pe a. Minute khata oxygen litre 800 siam chhuak thei khawl bun tur hian a hmunhma tur buatsaihin 27^th October, 2021 atang khan hnathawh tan niin December 2021 chhungin Civil works zawh fel a ni a. February 2022 ah a khawl hi bun zawh fel niin he khawl hian chatlak awm lovin khum 500 a chawm thei a ni. A plant chhungah hian electrical control panel, compression unit, air dryer, air tank, geolite chamber, 2000 litres oxygen tank leh khawl dang te awmin 250kVA transformer leh backup te pawh bun nghal a ni. Heng khawl rawn pek te hi a zavaiin nuai 150 man hu a ni a. A hmunhma siam nan leh senso tul dangah BCM in cheng nuai 23 sengin South Tuipui, Lunglei North, Lunglei West, Lunglei East leh Lunglei South MLA ten an MLA Fund atangin cheng nuai 20 an thawh khawm bawk a ni. He plant atanga oxygen siam chhuah chu cylinder-a thun chhawng leh thei turin Booster Pump la mamawh niin he hmanrua pawh hi an ngaihven nghal thu report a ni.

Vawiin hawnna inkhawm hi Rev Dr V Laldingliana, President BCM in kaihruaiin, Rev R Lalbiakliana, AGS Service BCM in hlanna a nei a, Pu Thongsuanmang Vualnam, PATH-in thutawi sawina hun hmangin Rev Dr Lalzarliana, Director, Communication Dept, BCM-in tawngtaiin hun a khar a ni. 

Health Minister hian Lunglei District chhunga Haulawng Health Sub-Centre leh Pukpui Health & Wellness Centre te pawh tlawh nghalin Oxygen Plant bunna tur building sak mek pawh a tlawh a, CMO Lunglei leh staff dangten an lo dawngsawng a, he lai hmuna Health deptment ram leh hmunhmate en nghalin hmalak dan tur hrang hrangte an sawi ho a ni.