Mizoram chhunga Damdawi In fai inelna, Kayakalp Award chu vawiin khan Central YMA Hall-ah State Quality Assurance Unit, National Health Mission buatsaihin sem a ni a; Health Minister Pu Lal Thanzara chu khuallian a ni.

Pu Lal Thanzara chuan National Health Mission hnuaia Quality Assurance-in an programme kalpui pawimawh tak, Kayakalp chu Mizoram chhunga sorkar Damdawi In te’n an thatpui thu leh, Damdawi In leh a chhehvel vawnfai kawng mai bakah a chhung lam inrelbawlna leh inenkawlna kawngah pawh nasa taka an hlawkpui a, mipui te pawhin an tangkaipui thu a sawi a. All State Meeting Delhi leh Regional Meeting Guwahati-a neih tum pawhin Mizoram chu hma la chak ber State zinga a tel thu tarlangin, chutiang ang nih theihna chu department thawktute mai bakah khawtlang hruaitute leh khaw mipuite tawiawmna vang a nih thu a sawi a. Health Minister chuan faina chu vawikhat thawh a duh tawk mai chi nilovin engtik lai pawha chhunzawm reng ngai a nih thu sawiin, he Kayakalp hmalakna pawh hian chhumlo chatlo a invawn reng a kawh tel avangin endikna pawh kalpui zel tum a ni, a ti a. Kayakalp Monitoring Visit-te pawh regular taka neih tuma hma lak mek a nih thu a sawi bawk.

“Kayakalp” hian a tum ber chu mihring hriselna lama inenkawlna hmun, Damdawi Inte leh Public Health Facilty reng reng fai taka enkawl leh natna hri darh thei (infection) tih tlem a ni a. India ramah chuan 15th May 2015 khan hawn (launch) a ni tawh a, Mizoramah chuan 9^th July 2015 khan hawn niin, a tirah chuan District Hospital chauh huam tir a ni a. Kumin 2017 khan a huam zauh a ni ta a; District Hospital, Sub-District Hospital (SDH), Community Health Centers (CHC), Primary Health Centers (PHC) zawng zawng a huam bakah Urban Primary Health Center (UPHC) zawng zawng a huam tel tawh ta a ni.

Kum 2017 Kayakalp Award dawngtute chu hengte hi an ni:

1) District Hospital zingah Civil Hospital Aizawl chu pakhatna niin, pawisa fai nuai ruk leh citation an dawng a; Lawngtlai District Hospital chu pahnihna niin pawisa fai nuai nga leh citation dawngin, pathumna Champhai District Hospital chuan pawisa fai nuai li leh citation an dawng a ni.

2) Sub District Hospital leh Community Health Centre hnuaiah pakhatna chu Biate CHC niin lawmman pawisa fai nuai ruk leh citatation an dawng a, pahnihna Sakawrdai CHC in pawisa fai nuai nga leh citation leh Vairengte CHC chu pathumna niin pawisa fai nuai leh citation an dawng a ni.

3) Primary Health Centre hnuai a District hrang hrang a lawmman dawngtute chuan pawisa fai, pakhatna in nuai hnih leh citation, pahnihna in singkua sangnga leh citation leh pathumna in singriat sangnga leh citation an dawng a. Lawmman latu te chu: - Aizawl East District atangin 1. Khawruhlian PHC, 2. Phullen PHC, 3. Darlawn PHC; Aizawl West District atangin 1. Reiek PHC,2. Aibawk PHC, 3. Lengpui PHC; Champhai District atangin 1. Khawbung PHC, 2. Hnahlan PHC, 3. Khawzawl PHC; Kolasib District atangin 1. Bukpui PHC, 2. Bilkhawthlir PHC, 3. Bairabi PHC; Lawngtlai District atangin Lungpher South PHC (lawngtlai district ah hian Lungpher chauhvin External assessmenta paltlang a ni); Lunglei District atangin 1. Chhipphir PHC, 2. Buarpui PHC, 3. Lungsen PHC; Mamit District atangin 1. Phuldungsei PHC, 2. Kawrtethawveng PHC, 3.Rawpuichhip PHC; Serchhip District atangin 1. Ngentiang PHC, 2. North Vanlaiphai PHC, 3. Chhingchhip PHC; Siaha District atangin 1. Tippa PHC, 2. Phura PHC leh 3. Chhaolo PHC te an ni.

4) Urban PHC's zinga lawmman pakhatna latu chu Chawlhhmun PHC niin pawisafai cheng nuai hnih an dawng a, pahnihna chu ITI PHC niin pawisafai cheng nuai khat an dawng a ni.

5) Kumin hian Special Award siam a ni a. He award hi District Hospital-ah chuan category pali ah then niin, lawmman pek dan chu hetiang hi a ni: Sustenance Award- Champhai District Hospital, Most Inspiring Award- Civil Hospital Aizawl, Most Improved Award- Lawngtlai District Hospital leh Best Landscape Award- Kolasib District Hospital an ni. Sub-District Hospital leh Community Health Centre hnuaiah chuan Sustenance Award- Vairengte CHC, Most Inspiring Award- Kolasib District, Biate CHC, Champhai District, Sakawrdai CHC, Aizawl District leh  Hnahthial CHC, Lunglei District te an ni a pawisa fai nuai khat theuh an dawng bawk.

Urban Primary Health Centre zingah Special Award hi category pahnih siam ni bawkin, ITI UPHC chuan Most Inspiring leh Best Landscape award chu a pahnih a la a; lawmman hian pawisa fai singhnih sangnga ve ve a keng a ni.

6) A chunga lawmman sem bakah hian tehfung hrang hrang hmanga teha mark 70% hmu chin, pakhatna atanga pathumna dinhmun luah zo silo te tan Commendation Award siam a ni bawk a. He award hian District hospital leh CHC/SDH category ah pawisafai cheng nuai khat leh certificate a keng tel a, PHC ten pawisafai cheng sing khat leh sang riat theuh bakah certificate an dawng bawk a ni. Commendation Award dawngtute chu District Hospital-ah Serchhip, Kolasib, Mamit leh Lunglei District Hospital te an ni a, CHC, SDH zingah Hnahthial, Thenzawl leh Kawrthah ten an la a; PHC zingah chuan Thingsulthliah, Suangpuilawn, Phuaibuang (Azl. East dist); Sairang, Sialsuk (Azl.West dist); Khawhai, Sialhawlk, Kawlkulh, NE Khawdungsei, Bungzung, Farkawn (Champhai dist); Kawnpui PHC (Kolasib dist); Bungtlang South, Bualpui NG, Sangau (Lawngtlai dist); Pangzawl PHC (Lunglei dist); Marpara, Zawlnuam PHCs (Mamit dist); East Lungdar, Khawlailung PHCs (Serchhip District) te an ni. Urban PHC ho zinga Commendation Award dawngtute chu Hlimen, Sihphir leh Lawipui PHC te an ni a, lawmman hian cheng sing nga leh certificate a keng tel a ni.

Vawiin Kayakalp lawmman semna inkhawmah hian Dr. Lalrozama, Mission Director, National Health Mission chuan kalkhawmte lawmna thu sawiin, Dr. R. Lalchhuanawma, State Nodal Officer, Quality Assurance, National Health Mission chuan Kayakalp chungchang report tawi a pe a. Lawmman dawngtu hrang hrangte hnen atanga thusawi ngaihthlak ni bawkin, hun hi Dr.H.Lalchungnunga, Director of Health Services in lawmthu sawiin a khar a ni.