Hospital building thar hawnna puala Chief Medical Officer Conference Hall-a inkhawm tawi buatsaihah Health Minister chuan hospital building thar leh quarters sak thar eng emaw zat hawn theih a ni ta chu lawmawm a tih thu sawiin, building thar sak a nih theih nana hma latu zawng zawng chungah lawm thu a sawi a. Hriselna chu mi zawng zawng mamawh a nih avangin hmun kilkhawr ber pawh thleng phaka hriselna kawnga hmasawnna a awm theih nan sawrkarin theih tawp a chhuah tih sawiin, hospital changtlung nei turin building tha neih ringawt a tawk lo va, khawl tha leh thawktute a pawimawh tel vek a, chumi kawngah chuan Lawngtlai District Hospital leh Lawngtlai District-a health facility hrang hrang tihchangtlun nan theih tawpa hma lak chhunzawm a nih tur thu a sawi.

COVID-19 dona kawngah Ministry of Health & Family Welfare-in Mizoram chu India rama state leh UT zawng zawng zinga hma la tha ber (best performing state)-ah a puang tih sawiin, Health Minister chuan a chhan bulpui ber chu chung lam hna thawh a ni a, chu bakah a hmanrua sawrkar, tlawmngai pawl, kohhran leh mipuite tan rualna rah a ni bawk, tih a sawi a. Pakhatna dinhmun hauh chhunzawm zel turin sawrkarin fimkhurna dan a zamte zawm chunga a tawp thleng tan mar pat a tul a ni tiin, theih tawp chhuah chhunzawm zel turin kal khawmte chu a chah a ni.

Health Minister chuan COVID-19 vanga airport screening, ramri duty leh lockdown te kalpui hmasa ber state kan nih thu sawiin, a tirah a test-na khawl leh a dahna hmun tur pawh awm lo chungin, kawng dap chawpin tun hi kan thleng, a ti a. Zoram Medical College (ZMC)-a RT-PCR khawl chhawk zangkhai nan district 10-ah Mini PCR TrueNAT Quattro khawl bun tura hma lak a nih thu leh tun thla chhung chuan hman kim theih beisei a nih thu sawiin, darkar khat chhunga a result hriat nghal theih leh ni khata sample 40/50 test theihna a nih bakah, COVID-19 kian hnuah pawh natna chi hrang hrang chi 16 enfiah nan hman zui theih a ni dawn a, COVID-19 kara malsawmna tia sawi theih a nih thu a sawi bawk.

He huna khual zahawm, Agriculture Development Board Vice Chairman Pu H. Biakzaua chuan District Hospital building thar sak a nih chungchangah sawrkar hotute leh health department chungah lawm thu sawiin, khawl leh thawktu chungchangah a tihchangtlunna tur pawh ngaihtuahsak zel turin a ngen nghal a. District Hospital building thar hawn ni chu Lawngtlai District mipuite tan ni chhinchhiah tlak leh hriat reng tur a nih thu a sawi.

He hun hi Health & Family Welfare Department Secretary Pu H. Lalengmawia, IAS chuan kaihruaiin, kal khawmte lawmna thu a sawi a. Lairam Higher Academy of Science-a Principal Rev. C. Chanchinmawia'n hunserh hmangin, PWD (Building) Superintending Engineer Er Lalruatkima'n DHL building an sak chungchanga technical report a pe a. Hospital & Medical Education Director Dr T. Lalhmangaihi'n lawm thu sawiin, hun khar a ni.

Vawiina hun hmanah hian Lai Autonomous District Council (LADC)-a Chief Executive Member Pu T. Zakunga leh a thawhpui member-te, District Bawrhsap Dr Andrew H. Vanlaldika leh department hrang hranga officer-te, tlawmngai pawl leh political party hruaitute an tel.

Vawiina hawn tak building thar hi IPD (In-patient Department) building block 1, Type-II Quarters block 2 (unit 12), Type-III Quarters block 2 (unit 12) leh Type-IV Quarters block 1 (unit 3) te a ni a. Tuna District Hospital Lawngtlai building luah lai mek hi OPD (Out-patient Department) building niin, tun dinhmunah khum 34 a awm mek a, building thar luah luh a nih hunah chuan khum 50 a awm thei tawh dawn a ni.

50-Bedded District Hospital Lawngtlai sak hna hi Non Lapsable Central Pool of Resources (NLCPR) sum hmanga thawh niin, Mizoram PWD (Building)-in an enkawl a. Rs nuai 1188.75 sanction niin, ni 07.12.2016 khan sak tan a ni a, ni 31.01.2020 khan zawh a ni.

IPD building hi a chhawng (floor 2) niin, ground floor (845.25 Sqm)-ah hian Gynaecology Ward, Paediatric Ward, Male Medical Ward, Female Medical Ward, Committee Room, Staff Room, Medical Superintendent Room, etc. a awm dawn a; first floor (360.29 Sqm)-ah hian Male Surgical Ward leh Female Surgical Ward, etc. a awm thung dawn a ni.

Hospital building thar a hawn zawh hian Minister chuan ANM School, Govt Lawngtlai College leh District Industries Centre te a tlawh nghal bawk.